რუსთავი 2-ის გენერალურმა დირექტორმა ნიკა გვარამიამ, სპეციალურ ბრიფინგზე განაცხადა, რომ მათ უზენაესს უკვე მიმართეს საკასაციო საჩივრით და მოუწოდა სასამართლოს, წარმოებაში მიიღოს რუსთავი 2-ის საქმე:

"ჩვენ გუშინ ფოსტით ჩავაბარეთ საკასაციო საჩივარი, სრული რწმენით რომ პირველი 2 ინსტანციის გადაწყვეტილება უკანონო და აბსოლუტურად დაუსაბუთებელია. მოვუწოდებთ უზენაეს სასამართლოს, ნუ გახდება დაკვეთის შემსულებელი, გადაარჩინოს დემოკრატია და სიტყვისა და გამოხატვის თავისუფლება".

ნიკა გვარამიამ საჩივრის დასაშვებობის კრიტერიუმებიც განმარტა:

"საკასაციო საჩივარი დასაშვებია, როდესაც სიტყვისა და თავისუფლების დარღვევას ეხება დავა. ასევე მაშინ, როცა საქმე მნიშვნელოვანია სამართლის განვითარებისა და ერთგვაროვანი სასამართლო პრაქტიკისთვის, როცა სააპელაციო სასამართლოს გადაწყვეტილება განსხვავდება უზენაესი სასამართლოს მანამდე არსებული პრაქტიკისგან და როცა სააპელაციო სასამართლოს მიერ საქმე განხილულია მნიშვნელოვანი საპროცესო დარღვევებით".

გვარამიამ საკასაციო ინსტანციას მიმართა, რომ ისინი გადაწყვეტენ დემოკრატიის ბედს, სიტყვისა და თავისუფლების გამოხატვისა და ასევე საქართველოში სამოქალაქო მშვიდობის ბედს:

"ყველა პროცესი, რომელიც პროვოცირებული იქნება თქვენი უკანონო გადაწყვეტილებით, იქნება თქვენს სინდისზე და ასევე თქვენს სამართლებრივ პასუხისმგებლობაზე".

რუსთავი 2-ის გენერალური დირექტორი უზენაესი სასამართლოს მოსამართლეებს მოუწოდებს, არ შეასრულონ დაკვეთა, საქმის განხილვა დაიწყონ და მიიღონ სამართლიანი გადაწყვეტილება.

ნიკა გვარამია მოსამართლე მზია თოდუას მიმართავს რომ აიცილოს რუსთავი 2-ის საქმე რადგან ისინი მას არ ენდობიან:

"მივმართავ მზია თოდუას, რომელიც პალატის თავმჯდომარეა, რომ მიუხედავად ჩემი ღრმა პატივიცემისა, ჩვენ არ გენდობით. თქვენ იყავით ქართუს იურიდიული დეპარტამენტის ხელმძღვანელი დანიშვნამდე, ჩვენი ინფორმაციით თქვე გაქვთ ორი შემოწირულობა გაკეთებული ბიძინა ივანიშვილის პარტიისთვის, ჯამში 60 000 ლარი, ამიტომ ნუ განიხილავთ ამ საქმეს".

ნიკა გვარამიას თქმით, არსებობს პრეზიდენტის პასუხისმგებლობაც, რადგან კოლეგიის 6 მოსამართლიდან 4 დანიშნულია ახალი ხელისუფლების მიერ, საქართველოს პრეზიდენტის წარდგინებით.