"გიხაროდეთ და იხალისეთ" - ამ სახელწოდებით გაავრცელა ვატიკანმა მრევლის მიმართ წლის მთავარი მიმართვა. 9 აპრილს გავრცელებულ მიმართვაში ქრისტიანებში არსებულ პრობლემებზეა ყურადღება გამახვილებული.

პაპმა გზავნილში სიწმინდის დეფინიციასა და მნიშვნელობაზე ისაუბრ. მრევლს მოუწოდა დაიცვან სიწმინდე ყოველდღიურობაში და ეძიონ სიწმინდე თავის მეზობლად. პაპის თქმით, სულის სიწმინდე ყოველდღიური მოთმინებით, სხვებზე ზრუნვითა და ქრისტეს მოძღვრების ერთგულებით მიიღწევა.

მიმართვაში ყურადღება გამახვილებულია მიგრანტების საკითხზე და ის აბორტთანაა შედარებული. კათოლიკური ეკლესია ეწინააღმდეგება აბორტს და მრევლს მოუწოდებს მსგავსი ყურადღება გამოიჩინონ მიგრანტების მიმართაც, რომელებმაც უკანასკნელ წლებში უამრავი განსაცდელი გადაიტანეს.

მან მრევლს ურჩია, უფრო მეტი დრო გაატარონ საკუთარ ახლობლებთან და ოჯახის წევრებთან, რადგან ახლა ადამიანები ზედმეტად ბევრ დროს უთმობენ ვირტუალურ სამყაროს და ჩვევებს ემონებიან. მას მიაჩნია, რომ აუცილებელია ადამიანებმა იუმორით შეხედონ სხვადასხვა ცხოვრებისეულ სირთულეებს.

რომის პაპი ბოლო მიმართვაში ნაწილობრივ თავის წინა ინტერვიუს დაუპირისპირდა. მან ახლა აღნიშნა, რომ ეშმაკი არსებობს და ის სულების წაწყმენდას ცდილობს. ქრისტიანები კი, სხვადასხვა ცდუნებებს ყოველდღიური ლოცვებითა და განსაკუთრებული მოთმინებით უნდა აღუდგნენ. მანამდე, ერთ-ერთ იტალიურ გამოცემასთან ინტერვიუში პაპმა აღნიშნა, რომ ეშმაკი იმ ტრადიციული გაგებით, როგორც ადამიანებს ესმით - არ არსებობს და ეს აღქმა უფრო მითოლოგიურია.

კათოლიკური ეკლესიის ე.წ. კონსერვატორული ფრთის წარმომადგენლები, ხშირად აკრიტიკებენ ფრანცისკეს ზედმეტად ღია და რბილი განცხადებებისთვის. პაპის მიმართ კრიტიკა განსაკუთრებით მას შემდეგ გააქტიურდა, რაც მისი ეს ინტერვიუ გამოქვეყნდა.