პარლამენტის წინ აქცია-მსვლელობის რამდენიმე მონაწილე პოლიციამ დააკავა. აქციის ორგანიზატორი ირაკლი კუპრაძე ამბობს, რომ დაკავებულია აუდიტორია 115-ის ოთხი წევრი.

მსვლელობის მონაწილეებს პარლამენტის წინ მჯდომარე აქციის გამართვა უნდოდათ და რუსთაველის გამზირის გადაკეტვა სურდათ, რა დროსაც პოლიციასთან დაპირისპირება მოხდა.

On.ge ცდილობს დაუკავშირდეს შსს-ს და გაარკვიოს კიდევ რამდენი ადამიანი დააკავეს და რა მიზეზით.

მსვლელობის ორგანიზატორები და იქ მისული ადამიანები შრომის უსაფრთხოების არსებულ მდგომარეობას ეწინააღმდეგებიან. ტყიბულელი მეშახტეების სოლიდარობის ნიშნად აქციის მონაწილეები თეთრი ყვავილებით მივიდნენ.

დღევანდელი აქცია უკავშირდება 5 აპრილის შემთხვევას. ტყიბულის შახტში 6 მუშა დაიღუპა, ხოლო სამი დაშავდა. ერთ-ერთი ორგანიზატორის, ირაკლი კუპრაძის განცხადებით, ამ შემთხვევაზე პასუხისმგებლობა ეკონომიკურმა გუნდა უნდა აიღოს. ისინი, ასევე, შრომის უსაფრთხოების გამოსწორებას ითხოვენ.

ორგანიზატორები, ასევე, შრომის უსაფრთხოების ახალ კანონს აფასებენ და ამბობენ, რომ ის არაეფექტური იქნება. მათი თქმით, კანონი არა ადამიანზე, არამედ ბიზნესზეა ორიენტირებული. ისინი, ეკონომიკის მინისტრის, დიმიტრი ქუმსიშვილის გადადგომასაც ითხოვენ.