ონლაინლექსიკონმა translate.ge-მ ფეისბუქზე განცხადება გაავრცელა, სადაც წერს, რომ ისიდორე გვარჯალაძის ოჯახი მათი ლექსიკონის საიტიდან ამოღების შემდეგ, ინგლისური სიტყვების ამოღებას მოითხოვს.

საიტის განცხადებაში ნათქვამია, რომ ისიდორე გვარჯალაძის ოჯახი საავტორო უფლებების ასოციაციასთან ერთად, translate.ge-ს იმ პოსტის წაშლას სთხოვენ, სადაც გვარჯალაძეების ოჯახთან არსებულ დავაზეა საუბარი.

"წინააღმდეგ შემთხვევაში ცილისწამებაზე სასამართლოში ჩივილს გეგმავენ",- ნათქვამია გაცხადებაში.

On.ge ინფორმაციის გადამოწმების მიზნით საავტორო უფლებების ასოციაციას დაუკავშირდა. როგორც ასოციაციაში განგვიცხადეს translate.ge-მ საჩივრის არასწორი ინტერპრეტაცია მოახდინა და გვარჯალაძეების ოჯახი საიტიდან არა ინგლისური სიტყვების, არამედ ლექსიკონის სტრუქტურის ამოღებას ითხოვს.

"ლექსიკონის ავტორების ოჯახი ლექსიკონის სტრუქტურის დარღვევაზე ჩივის. translate.ge-ს არ უნდა ჰქონდეს სტრუქტურა იმ ფორმით, როგორც ეს გვარჯალაძეებმა მოიფიქრეს. ლექსიკონი შედგენილი ნაწარმოებია და საავტორო უფლება შედგენაზე და განლაგებაზე ვრცელდება და არა სიტყვებზე. საიტმა ამოიღო განმარტებები და დატოვა სტრუქტურა. ჩვენ ამ სტრუქტურის ამოღებას ვითხოვთ. ერთი სიტყვა ბევრი პოზიციითაა წარმოადგენილი და ამ სიტყვების განლაგების სტრუქტურა გვარჯალაძეების მოფიქრებულია", - განუმარტეს On.ge-ს საავტორო უფლებათა ასოციაციაში.

ონლაინლექსიკონ translate.ge-ზე 70 000-ზე მეტი სიტყვა წაიშალა. კომპანიამ, განმარტების მიზნით, განცხადება გამოაქვეყნა და გადაწყვეტილება საავტორო უფლებების ასოციაციასთან წაგებული სამართლებრივი დავით ახსნა.

იმისთვის, რომ translate.ge-მ ფუნქციონირება შეძლოს ისიდორე გვარჯალაძის მიერ 1975 წელს შექმნილი ლექსიკონის გამოსაყენებლად ყოველთვიურად 300 ლარი და საავტორო უფლებების დარღვევისთვის 13 400 ლარიანი ჯარიმა უნდა გადაიხადოს.

სასამართლოს მიერ დადგენილი თანხა მას შემდეგ შემცირდა, რაც მხარეებს შორის შეთანხმება შედგა. translate.ge-მ კი გადაწყვიტა ყოველთვიურად 300 ლარი არ გადაიხადოს და სადავო სიტყვები ლექსიკონის ბაზიდან ამოიღო.

translate.ge-სა და გვარჯალაძეების მემკვიდრეებს შორის დავა 2015 წლიდან მიმდინარეობდა. სასამართლო დავა ორი წელი გაგრძელდა.

ამავე თემაზე:რატომ წაიშალა translate.ge-ის ბაზიდან 70 ათასი სიტყვა