საქართველოს პარლამენტის უპარტიო წევრმა, სალომე ზურაბიშვილმა გადაწყვიტა თავისი ამომრჩევლისთვის აეხსნა რატომ დაუჭირა 4 აპრილს საზოგადოებრივი მაუწყებლის მეურვედ ნინია კაკაბაძის არჩევას მხარი. მისი თქმით, გადაწყვეტილება დამოუკიდებლად, თავისი პოლიტიკური შეხედულებებიდან გამომდინარე მიიღო.

"ნინია კაკაბაძეს საზოგადოებრივი მაუწყებლის სამეურვეო საბჭოს კანდიდატურას დავუჭირე მხარი და სამაგიეროდ, ნინო ლომჯარიას წინააღმდეგ ვუყარე კენჭი სახალხო დამცველის პოსტზე", - წერს ფეისბუქზე პარლამენტის დეპუტატი.

მისი აზრით, კაკაბაძეც და ლომჯარიაც შეხედულებებით ნაციონალურ მოძრაობასთანაა დაახლოებული. დეპუტატი აღნიშნავს, რომ საზოგადოებრივ მაუწყებელში განსხვავებული პოზიცია აუცილებელია და საფრთხის შემცველი არაა.

"მეორე შემთხვევაში - სახალხო დამცველისა- რომელიც აუცილებლად უნდა იყოს მიუკერძოებელი, ზეპარტიული და ობიექტური, ლომჯარიას კანდიდატურა სრულიად მიუღებელი იყო, რაც დადასტურდა მის ახლახან წარმოდგენილ აშკარად პოლიტიკურად ინსპირირებულ წლიურ ანგარიშში და პოზიციებში", - წერს ზურაბიშვილი. თუმცა, ლომჯარია პარლამენტმა 2017 წლის 30 ნოემბერს აირჩია, მანამდე კი სახალხო დამცველი უჩა ნანუაშვილი იყო.

საქართველოს პარლამენტმა გუშინ, 4 აპრილს საზოგადოებრივი მაუწყებლის სამეურვეო საბჭოს წევრად ნინია კაკაბაძე აირჩია.

ამავე თემაზე: