მსახიობ გიორგი გიორგანაშვილს ახალი ბრალი ორგანიზებული ნარკოდანაშაულის საქმეზე ოფიციალურად წაუყენეს. სასჯელაღსრულების დაწესებულებაში ბრალდება მას დღეს, 2 აპრილს გააცნეს.

გამოძიება ბრალდებულს ქვეყანაში დიდი რაოდენობით ნარკოტიკული საშუალებების შემოტანის ორგანიზებაში მონაწილეობას ედავება. გიორგანაშვილი ბრალს არ აღიარებს. შსს-ში ამბობენ, რომ ბახალასთვის და კიდევ სამი პირისთვის ბრალის წაყენებით საქართველოში სუბოტექსის შემცველი 900 აბის შემოტანის საქმე გახსნეს.

შინაგან საქმეთა სამინისტროს განცხადებით, ბახალას ახალი ბრალი სისხლის სამართლის კოდექსის 260-ე და 262-ე მუხლებით წარუდგინეს, რაც გულისხმობს ორგანიზებული ჯგუფების მიერ ნარკოტიკული საშუალებებეის უკანონო შეძენა-შენახვასა და ქვეყანაში შემოტანას. დანაშაული ითვალისწინებს 20 წლამდე ან უვადო თავისუფლების აღკვეთას.

გამოძიების ვერსიით, 2017 წლის იანვარში ირაკლი ქორიძე თავის ნაცნობებს შეუთანხმდა - გიორგი გიორგანაშვილსა და ჯაბა ხულორდავას, რომ მათ უცხოეთიდან საქართველოში უკანონოდ შემოეტანათ განსაკუთრებით დიდი ოდენობით ნარკოტიკული საშუალება.

"გიორგი გიორგანაშვილი ირაკლი ქორიძის დაფინანსებით გაემგზავრა საზღვარგარეთ, სადაც იმყოფებოდა 2017 წლის 18 იანვრიდან 2017 წლის 24 იანვრის ჩათვლით. ამ პერიოდში, მან უკანონოდ შეიძინა განსაკუთრებით დიდი ოდენობით ნარკოტიკული საშუალება ბუპრენორფინის შემცველი 900-მდე აბი, სხვადასხვა ზომის ნატეხები და ფხვნილი. ის ტრაპიზონში ფარულად შეხვდა ჯაბა ხულორდავას და საქართველოში უკანონოდ შემოტანის მიზნით გადასცა შეძენილი ნარკოტიკული საშუალება. 25 იანვარს, შინაგან საქმეთა სამინისტროს თანამშრომლებმა ჯაბა ხულორდავა და მისი ავტომობილი გაჩხრიკეს და ამოიღეს გიორგი გიორგანაშვილის მიერ მისთვის გადაცემული ნარკოტიკული საშუალებები", - ნათქვამია შსს-ს განცხადებაში.

ამ დროისთვის, ჯაბა ხულორდავა მსჯავრდებულია და სასჯელის სახით განსაზღვრული აქვს 7 წლით თავისუფლების აღკვეთა. დანაშაულის ორგანიზებაში ბრალდებულ წარსულში მსჯავრდებულ ირაკლი ქორიძეს პატიმრობა უკვე შეეფარდა.

ბახალა ახლა მსჯავრდებულია და ციხეშია. 23 იანვარს თბილისის საქალაქო სასამართლომ მას სხვა საქმეზე, 0,3726 გრამი ბუპრენორფინის ფლობისთვის 8-წლიანი პატიმრობა მიუსაჯა.

ამავე თემაზე: