"შავკანიანთა სიცოცხლე მნიშვნელოვანია" - ამ ლოზუნგით ბატონ-რუჯში, ლუიზიანას შტატში, ქალაქის პოლიციის შენობის წინ დემონსტრანტები შეიკრიბნენ. დემონსტრანტები პოლიციის მიერ ალტონ სტერლინგის მკვლელობის ფაქტს აპროტესტებდნენ.

სწორედ ამ აქციაზე გადაიღეს უკვე "ისტორიულად" წოდებული კადრი, რომელიც ნიუ ორლეანელ ფოტოგრაფ ჯონათან ბახტმანს ეკუთვნის.

BuzzFeed-სთვის მიცემულ ინტერვიუში ფოტოგრაფი იხსენებს აქციას, სადაც დაახლოებით 200-მდე ადამიანი იყო შეკრებილი. დემონსტრანტებმა გზის სავალი ნაწილი გადაკეტეს. სამართალდამცავებმა და სპეცრაზმის თანამშრომლებმა დემონსტრანტებს დაშლისკენ მოუწოდეს. ნაწილმა უარი თქვა ტერიტორიის დატოვებაზე, სამართალდამცავებმა მათი გაყვანა დაიწყეს. სწორედ ამ კადრების დაჭერას ცდილობდა ჯონთან ბახტმანი, როდესაც გზაზე უმოძრაოდ მდგარი ქალი დაინახა. ფოტოგრაფი იხსენებს, რომ მისი პრინციპული გამომეტყველების მიხედვით ცხადი იყო, რომ ის გზიდან გადასვლას არ აპირებდა.

"მე უბრალოდ ბედნიერი ვიყავი, რომ მსგავსი კადრის გადაღების საშუალება მომეცა. ეს იყო პირველი კადრი, რომელიც როიტერს მივაწოდე, რადგან ვიცოდი რამდენად მნიშვნელოვანი იყო ის.

დემონტსრანტი მალევე დააკავეს, თუმცა სურათი უკვე იქცა მშვიდობიანი სამოქალაქო დაუმორჩილებლობის სიმბოლურ კადრად და ვირუსულად მოედო სოციალურ ქსელებს. საინფორმაციო სააგენტოებმა კადრი პროტესტის სიმბოლოდ მიიჩნიეს.