ნეიონაცისტური დაჯგუფება ქართული მარშის ლიდერი სანდრო ბრეგაძე გამოძიებასთან თანამშრომლობს. შინაგან საქმეთა სამინისტროს ინფორმაციით, მისი დაკითხვა უკვე დასრულდა და მან პოლიციის შენობა დატოვა.

როგორც On.ge-ს უწყებაში უთხრეს, გამოძიების ინტერესებიდან გამომდინარე, უახლოეს დღეებში, იგი პოლიციაში კვლავ იქნება დაბარებული გამოსაკითხად.

19 მარტს ქართული მარშის წევრებმა რუსთავი 2-თან აქცია გამართეს. მათ მიაჩნდათ, რომ ტელეწამყვანმა გიორგი გაბუნიამ მორწმუნეთა "რელიგიურ გრძნობებს" შეურაცხყოფა მიაყენა, როცა 18 მარტს გადაცემა P.S.-ში იესო ქრისტეს ჯვარცმაზე ისაუბრა.

აქციაზე ქართული მარშის წევრებმა, რუსთავი 2-ის ჟურნალისტს დავით ერაძეს სცემეს. პოლიციამ ქართული მარშის 6 წევრი დააკავა.

19 მარტს გამართული აქციის შემდეგ სანდრო ბრეგაძე დაკითხვაზე იმყოფებოდა. ქართული მარშის წევრებმა განაცხადეს, რომ მასზე პოლიციელებმა იძალადეს, რის გამოც ის საავადმყოფოში იმყოფებოდა. თუმცა, ღუდუშაურის კლინიკის პრესსამსახურში თქვეს, რომ ბრეგაძეს გარეგანი დაზიანებები არ აღენიშნებოდა და მისი ჯანმრთელობის მდგომარეობა დამაკმაყოფილებელი იყო. მიუხედავად ექიმების დასკვნისა ბრეგაძე სუბიექტური ჩივილების მიზეზით კლინიკაში რჩებოდა და გაწერა არ სურდა. ბრეგაძე დაკითხვაზე რამდენიმე საათის წინ დაიბარეს.

ამავე თემაზე: