საქართველოს ბანკი — სუხიშვილების გენერალური სპონსორი.

ზაფხულის დადგომასთან ერთად, საქართველოს ყველა კუთხემ კვლავ ერთ სივრცეში — თაკარას ღია სცენაზე მოიყარა თავი. მეექვსე წელია რაც ამ ექსპერიმენტულ სცენაზე ტრადიციისა და თანამედროვეობის სინთეზით ერთიანდება ყველაფერი ის, რაც ქართულ ცეკვას საუკუნეების განმავლობაში ქმნიდა — ისტორია, ხასიათი, მოძრაობა და ემოცია.

საქართველოს ბანკისა და SOLO-ს მხარდაჭერით შექმნილი თაკარა, სუხიშვილების უწყვეტი მოძრაობის, განვითარებისა და შთაგონების სივრცეა. ადგილი, სადაც 80 წლიანი მემკვიდრეობა თანამედროვე ხედვას ხვდება, ხოლო ტრადიცია ყოველ სეზონზე ახალ სიცოცხლეს იძენს.

რეკონსტრუქცია

თაკარას თითოეული სეზონი განსხვავებული იდეითა და სახელწოდებით იქმნება, რაც კიდევ ერთხელ ადასტურებს, რომ სუხიშვილები არასდროს ჩერდებიან, მუდმივად ავითარებენ საკუთარ ხელწერას და ახალ შესაძლებლობებს ეძებენ.

ცვლილებები მხოლოდ მუსიკას, კოსტიუმებსა და ქორეოგრაფიას არ ეხება. წელს მნიშვნელოვანი გარდასახვა თავად სივრცემაც განიცადა — განახლებული თაკარა უფრო ფართო აუდიტორიას მასპინძლობს და მაყურებელს განსხვავებულ გამოცდილებას სთავაზობს.

როგორც ანსამბლის დირექტორი, გენერალური პროდიუსერი და კოსტიუმების მხატვარი, ნინო სუხიშვილი აღნიშნავს, სწორედ ამ პროცესებმა განსაზღვრა წლევანდელი პროგრამის სახელწოდებაც — რეკონსტრუქცია.

"თაკარას სცენა შთაგონების ადგილია. ამ სცენიდან მოდის იდეები. სახელწოდება რეკონსტრუქცია თავად პროცესმა გვიკარნახა. თაკარას ღია სცენამ დიდი ცვლილებები განიცადა. დაემატა ლოჟები, ტერასები, გაიზარდა ადგილების რაოდენობა და სივრცე ახლა კიდევ უფრო მეტ სტუმარს მასპინძლობს. სწორედ ამ განახლების პარალელურად ვმუშაობდით ახალ პროგრამაზე და საბოლოოდ სახელიც ამ იდეას დავუკავშირეთ”, — აღნიშნავს ნინო სუხიშვილი.

წლევანდელი სეზონის ერთ-ერთი გამორჩეული ნომერია ორღობე. უახლესი ცეკვა, რომელიც სოფლის დღესასწაულს, სიხალისესა და ერთიანობას აცოცხლებს.

"ორღობეს ცეკვა თაკარას სივრცეში დაიბადა. თავდაპირველად, მისი რეკონსტრუქცია ორღობეში დაიწყო. ცეკვის არქიტექტურა ისე ჩამოყალიბდა, რომ მოცეკვავეები ორ რიგად, წყვილებად მოძრაობენ. იქმნება განცდა, თითქოს მაყურებლის წინაშე მართლაც სოფლის ორღობეში მიმდინარე ცეკვა-თამაშია. დღესასწაული, სიხალისე და სიმხიარულე“, — გვიყვება ნინო სუხიშვილი.

და მაინც, მთავარი სცენა საქართველოა

ქართული ცეკვა ჯერ სცენის მიღმა იბადება — მთაში, ზღვის ნაპირზე, სოფლის ეზოებში, შრომაში, დღესასწაულსა და ყოველდღიურობაში. იქ, სადაც თითოეულ მოძრაობას თავისი ისტორია აქვს, ხოლო თითოეული რიტმი იმ ხალხის ხასიათს, ცხოვრების წესსა და ტრადიციებს ასახავს, რომელმაც ის შექმნა.

სწორედ ეს მრავალფეროვნება ერთიანდება თაკარას სცენაზეც, სადაც საქართველოს სხვადასხვა კუთხე მოძრაობად ცოცხლდება. აქ არის განსხეულებული იდეა, რომელსაც საქართველოს ბანკის ვიდეორგოლი — საქართველოს შემოქმედება, რომელიც არ ჩერდება გადმოსცემს — სვანური სიმტკიცე, მთიულური სილაღე, აჭარული მოძრაობის ელეგანტურობა, ხორუმის ძალა და ერთიანობის განცდა, რომ განსხვავებული ხასიათის მიუხედავად, თითოეული ცეკვა ერთ უწყვეტ მოძრაობას ქმნის.

კერძოდ, ქარაფშაში თავისუფალი მოძრაობა და იმპროვიზაცია იგრძნობა, ჯარა კი სვანური სიზუსტითა და დისციპლინით გამოირჩევა. მათგან განსხვავებული ენერგია მოაქვს აჭარულ კინტრიშს — მსუბუქსა და სიცოცხლით სავსე ცეკვას. ექსპერიმენტული სივრცე თაკარასთვის ორგანულია ქალის მრავალმხრივი ბუნება — სცენაზე ის ერთდროულად ასახავს სინაზესა და მგრძნობიარობას, თუმცა, იმავდროულად, ავლენს ხასიათის სიმტკიცეს, ძალასა და ურყევ მიზანდასახულობას.

“ბევრი კუთხის ცეკვა გვაქვს წარმოდგენილი: სვანური, მთიულური, ხორუმის უახლესი ვერსია, სადაც ქალები და კაცები ერთად ცეკვავენ. ამ ცეკვაში თითქოს სამიზნე საქართველო ხდება. ასევე წარმოდგენილია აჭარული ცეკვებიც. ზოგადად, არის კომპოზიციები, სადაც სხვადასხვა კუთხის ილეთები ერთიანდება და ამ ყველაფრით თითქოს საქართველოს ერთიანობას ვუსვამთ ხაზს. ცეკვების შერჩევა ხდება სხვადასხვანაირად. თაკარას სცენაზე არაერთი სახელწოდებით გვქონია პროგრამა გატანილი. კოსტიუმებიც შეიცვალა, ცეკვები გადაკეთდა. ჩემი პირადი აზრია, რომ რეკონსტრუქცია იყო ყველაზე წარმატებული პროგრამა, ჩვენს პროგრამებს შორის“, — ამბობს ნინო სუხიშვილი.

თითოეული კუთხე საკუთარ ამბავს ჰყვება, თუმცა საბოლოოდ ყველა მოძრაობა ერთ საერთო ისტორიამდე — საქართველომდე მიდის.

ძველისა და ახლის სინთეზი

თაკარას რეკონსტრუქციის მთავარი იდეა ძველისა და ახლის სინთეზშია, რომელიც უწყვეტ განვითარებას გამოხატავს. გზა, სადაც ტრადიცია მუდმივად მოძრაობს, ახალ იდეებს ხვდება და თანამედროვე ფორმით აგრძელებს არსებობას. თითოეული სეზონი ახლის ძიების, ექსპერიმენტისა და განვითარების გაგრძელებაა, სუხიშვილების ხელწერაც კიდევ უფრო მრავალფეროვანი ხდება.

აქ აუდიტორია დასის ნაწილია და მცირე დროით ისიც ნაციონალური ბალეტის წევრად გრძნობს თავს. ეს იმიტომ, რომ შესაძლებელია მოცეკვავეების ტექნიკას, სინქრონსა და ოსტატობას მცირე დისტანციიდან დააკვირდე, ახლოს, ბარიერების გარეშე.

ნინო სუხიშვილის თქმით, ყოველი ახალი იდეის უკან კონკრეტული ემოცია და სათქმელია — ხშირად ისეთი გზავნილები, რომლებიც პირდაპირ არ ითქმის მოძრაობაში, მუსიკასა და სცენურ ენაში იკითხება.

“ჩვენ ყოველთვის ვცდილობთ, იმ მოვლენებს, რომლებიც გვაღელვებს რაღაც ფორმით შევეხოთ. შეიძლება პირდაპირ არ ვთქვათ, მაგრამ თითოეულ ნამუშევარში ჩვენს პატარა კოდს ვტოვებთ“, -— აღნიშნავს ნინო სუხიშვილი.

თაკარას წლევანდელი სეზონი დასრულდა. და უკვე ველოდებით ახალი სეზონის გახსნას, ახალი დადგმებით.

სუხიშვილები — საქართველოს შემოქმედება, რომელიც არ ჩერდება.

საქართველოს ბანკი — სუხიშვილების მთავარი სპონსორი.