სულ ახლახან გახდა ცნობილი, რომ 2027 წლის ევროვიზიის სიმღერის კონკურსი შავი ზღვის სანაპიროზე ჩატარდება. სამთვიანი განხილვის შემდეგ გადაწყდა, რომ რიგით 71-ე ევროფესტივალს ბულგარეთის ქალაქი ბურგასი უმასპინძლებს. შევიტყვეთ კონკურსის თარიღებიც: ნახევარფინალური ტურები 11 და 13 მაისს, გრანდიოზული ფინალი კი 15 მაისს გაიმართება.

ევროვიზიის მასპინძელი ქალაქის შერჩევა მთელი ზაფხულის განმავლობაში მიმდინარეობდა და ამ პროცესში ჩართულები იყვნენ კონკურსის ორგანიზატორები როგორც ბულგარეთის საზოგადოებრივი მაუწყებლიდან, ასევე ევროვიზიის შემქმნელი ევროპის მაუწყებელთა კავშირიდან (EBU). ისინი სტუმრობდნენ ბულგარეთის ოთხ სხვადასხვა ქალაქს და აფასებდნენ შეთავაზებულ საკონცერტო დარბაზებს. საბოლოოდ კი, მათი არჩევანი არენა ბურგასზე შეჩერდა, რომელიც 15 ათასამდე ადამიანს იტევს.

"ბურგასი ევროვიზიას რაღაც განსაკუთრებულს სძენს", — აცხადებს კონკურსის ხელმძღვანელი მარტინ გრინი, — "ესაა სიცოცხლით სავსე, სტუმართმოყვარე ქალაქი, რომელსაც მუსიკალური და კულტურული იდენტობა გამოარჩევს და აქვს იმის ამბიცია, შესაბამისი ინფრასტრუქტურა და შემართება, რომ ევროვიზიის ოჯახს უმასპინძლოს".

მასპინძელი ქალაქის გამოვლენით, მომავალი წლის ევროფესტივალისთვის სამზადისი მომდევნო ეტაპზე ინაცვლებს. სულ მალე, 1-ელ სექტემბერს გაიხსნება ე.წ. ევროვიზიის ახალი სეზონი — ამ თარიღის შემდეგ გამოსულ ნებისმიერ სიმღერას ექნება საშუალება, 2027 წლის ევროვიზიის სცენაზე გაჟღერდეს.

2027 წლის ევროფესტივალს კიდევ ერთი მნიშვნელოვანი სიახლე გამოარჩევს: ბოლო თორმეტი წლის განმავლობაში პირველად, კონკურსზე დებიუტანტი ქვეყანა გვეყოლება — არც მეტი, არც ნაკლები, კანადა. ხუთწლიანი პაუზის შემდეგ, ევროვიზიას უბრუნდება ჩრდილოეთ მაკედონიაც.

საქართველოს მომავალი წლის ევროვიზიაზე მონაწილეობა ოფიციალურად ჯერჯერობით არ დაუდასტურებია. შეგახსენებთ, რომ ჩვენი ქვეყანა კონკურსზე წელს ჯგუფმა ბზიკებმა წარადგინა, მაგრამ ისინი ფინალს მიღმა დარჩნენ.

წლევანდელი ევროფესტივალი კი, რომელსაც ავსტრია მასპინძლობდა, ბულგარეთის მოგებით დასრულდა. 27 წლის პოპვარსკვლავმა დარამ, სიმღერით Bangaranga, თავის ქვეყანას ევროვიზიაზე პირველი გამარჯვება მოუტანა.

ასევე იხილეთ: