უკრაინის გენერალურმა პროკურორმა, იური ლუცენკომ, დეპუტატი ნადეჟდა სავჩენკო რადაში ტერაქტის მოწყობაში დაადანაშაულა. მისი თქმით, გამოძიებას აქვს უტყუარი მტკიცებულებები იმისა, რომ პარლამენტში ტერაქტის მოწყობისთვის სავჩენკო განკარგულებებს პირადად გასცემდა.

"პირადად გასცემდა განკარგულებებს როგორ მოეწყოთ ტერორისტული აქტი აქ, ამ დარბაზში, სამხედრო ყუმბარებით გაენადგურებინათ სამთავრობო და ოფიციალური აივნები, ნაღმტყორცნებით უმაღლესი რადის გუმბათი ჩამოეგდოთ და გადარჩენილები ავტომატიდან მოეკლათ", - განაცხადა გენერალურმა პროკურორმა პარლამენტის სხდომაზე.

მან, ასევე, განაცხადა, რომ დღესვე მოითხოვს პარლამენტში ნადეჟდა სავჩენკოს დაკავებისა და მის წინააღმდეგ სისხლის სამართლის საქმის აღძვრის უფლებას.

მანამდე ცნობილი გახდა, რომ ტყვეების გათავისუფლების ცენტრის ოფიცრის კორპუსის ხელმძღვანელთან, ვლადიმერ რუბანთან ერთად ნადეჟდა სავჩენკო სახელმწიფო გადატრიალების მომზადებაში თანამონაწილეობასა და მომზადებაში იყო ეჭვმიტანილი.