საქართველოს კომუნიკაციების კომისია თავმჯდომარისთვის თანაშემწეს ეძებს. კონკურსი უკვე დასრულდა, კანდიდატი შერჩეული არაა, თუმცა კომისიის თანამშრომელი ძებნას სოციალურ ქსელებში კვლავ აგრძელებს.

კომისიის საერთაშორისო ურთიერთობების დეპარტამენტის მთავარი სპეციალისტი, თამარ პოპიაშვილი 13 მარტს ფეისბუქჯგუფში წერდა, რომ ეძებდნენ 40 წლამდე ქალს, რომლის მოვალეობაში ყავის მოდუღებაც შედიოდა. სწორედ ის იკავებდა მანამდე თავმჯდომარის მოადგილის თანამდებობას.

კომუნიკაციების კომისიის ვებგვერდზე განთავსებულ ვაკანსიის განცხადებაში არაფერი წერია პირის შერჩევის ისეთ კრიტერიუმებზე, სქესსა და ასაკზე, რომელიც შესაძლოა, დისკრიმინაციის საფუძველი ყოფილიყო. თუმცა კომისიის აპარატის საერთაშორისო ურთიერთობებია დეპარტამენტის მთავარი სპეციალისტი, თამარ პოპიაშვილი ფეისბუქჯგუფში თანამშრომლის შერჩევის სხვა კრიტერიუმებზე წერდა.

ფოტო: On.ge

პოპიაშვილს გამოეხმაურა ერთ-ერთი ფეისბუქმომხმარებელი, რომელმაც მიწერა, რომ კონკურსი ხელახლა გამოეცხადებინათ და შესაძლო გენდერულ დისკრიმინაციაზეც მიუთითა.

"ყავის მოდუღებაც შედის მოვალეობაში და როგორ წარმოგიდგენიათ ბიჭი? როცა არ იცით რატომ ლაპარაკობთ?" - ასე უპასუხა დასმულ კითხვას კომუნიკაციების კომისიის თანამშრომელმა.

On.ge დაუკავშირდა კომუნიკაციების კომისიის პრესსამსახურის ხელმძღვანელსაც და თავად თამარ პოპიაშვილსაც. პრესსამსახურის ხელმძღვანელი ამბობს, რომ საკითხი არასერიოზულია და კითხვებს პასუხებს არ სცემს. საუბარი არ ისურვა პოპიაშვილმაც.

საქართველოს სახალხო დამცველი საქართველოს კომუნიკაციების კომისიის თავმჯდომარის, კახა ბექაურის თანაშემწის შესარჩევად გამოცხადებული ვაკანსიის დეტალებს შეისწავლის. სახალხო დამცველი დაადგენს არის თუ არა უწყების მიერ გამოცხადებული ვაკანსია დისკრიმინაციული.

სახალხო დამცველის აპარატის თანასწორობის დეპარტამენტის უფროსი, ქეთევან შუბაშვილი On.ge-სთან საუბრისას ამბობს, რომ ვაკანსიაში სქესისა და ასაკის მითითება დასაბუთებული უნდა იყოს, სხვა შემთვევაში კი დისკრიმინაციის საფუძველი შეიძლება გახდეს.

"პრობლემა ისაა, რომ შეიძლება ოფიციალურად არ იყოს [რაღაც] კრიტერიუმები მოთხოვნილი, მაგრამ პრაქტიკაში დისკრიმინაცია მაინც იყოს. ელემენტარულად, გასაუბრებაზე რომ დაიბარებს ადამიანს, იქედან შეარჩიოს ქალი და დაავალოს ხოლმე მას მაგალითად, ყავის მოდუღება იმიტომ, რომ ქალია", - ამბობს შუბაშვილი.

მისი თქმით, ორგანიზაციების დიდმა ნაწილმა დღეს უკვე იცის, რომ ვაკანსიაში სქესისა და ასაკის მითითება დისკრიმინაციად აღიქმება და ამის გამო "ოფიციალურად" თავს არიდებენ.