"ბევრი რამ შეიძლება, არ იყოს მისაღები ამ პასუხში, ერთი რამ კი აუცილებლად სათქმელია. ეს პასუხი ტოვებს სივრცეს საუბრისათვის. ჩვენ ყველაფერი უნდა გავაკეთოთ იმისათვის, რომ ასეთი სივრცე შეიქმნას", - საქართველოს პრემიერ-მინისტრმა, გიორგი კვირიკაშვილმა რუსეთის საგარეო უწყებიდან მიღებული პასუხი შეაფასა.

დღეს,14 მარტს გამართულ მთავრობის სხდომაზე, პრემიერმა აღნიშნა, რომ მისი განცხადება და რუსეთისადმი მიმართვა არასწორად შეფასდა. მისი თქმით, ქვეყანაში სტაბილურობის უზრუნველსაყოფად საჭირო ნაბიჯები საკუთარი იმიჯის ხარჯზე გადადგა:

"ამ დღეების განმავლობაში მოვისმინე რამდენიმე აბსურდული შეფასება იმ განცხადების, რომელიც მე გავაკეთე. მინდა მკაფიოდ განვაცხადო, რომ თითოეული ჩვენი ნაბიჯი, რა თქმა უნდა, ემსახურება ქვეყნის ინტერესებს. როდესაც საუბარია ძალიან მძიმე პროვოკაციების თავიდან აცილებაზე, ქვეყანაში სტაბილურობის უზრუნველყოფაზე, ჩვენ, პოლიტიკოსებმა უნდა გავაკეთოთ ყველაფერი ამ დროს, რათა დაძაბულობა შევანელოთ, თუნდაც ეს გადიოდის ჩვენი საკუთარი იმიჯის ხარჯზე და ხაზზე."

კვირიკაშვილმა აღნიშნა, რომ ჟენევის დისკუსიების ფორმატში თანამშრომლობა აუცილებელია სტაბილურობის მისაღწევად:

"ამ ფორმატში უნდა გადავდგათ ყველა ნაბიჯი, რომელიც თუნდაც მცირე პროგრესს მოგვიტანს. ეს მცირედი პროგრესი არის საქართველოში სტაბილურობის წყარო. ამ არეულ მსოფლიოში თუ რამე სჭირდება ჩვენს ქვეყანას ეს არის სტაბილური ცხოვრების საშუალება."

საქართველოს პრემიერ-მინისტრმა გიორგი კვირიკაშვილმა რუსეთის ხელისუფლებას მოუწოდა, რომ რთული ვითარების დასაძლევად ერთობლივი ნაბიჯები გადადგან. რუსეთის საგარეო უწყებამ კი პრემიერს უპასუხა, რომ ურთიერთობის გაჯანსაღებით თავადაც დაინტერესებული იყვნენ.