"გიორგი კვირიკაშვილმა თავისი გაუაზრებელი, უპასუხისმგებლო და გულუბრყვილო მიმართვით რუსეთს კიდევ ერთი არგუმენტი და ციტატა მისცა, რომელსაც ისინი გამოიყენებენ საქართველოს ინტერესების წინააღმდეგ", - ამ სიტყვებით გამოეხმაურა ევროპული საქართველოს ლიდერი გიგა ბოკერია რუსეთის საგარეო საქმეთა სამინისტროს განცხადებას. რუსეთის საგარეო საქმეთა სამინისტრომ ასე უპასუხა საქართველოს პრემიერ-მინისტრის განცხადებას.

"რუსეთის განცხადებით ნათქვამია, მიხედეთ ამ ორმხრივ მიმართულებას, იმიტომ, რომ რუსეთის ფედერაცია არაფერ შუაში არ არის ამ ყველაფერთან. ჩაეჭიდნენ ამ უპასუხისმგებლო და ძალიან მავნებლურ განცხადებას, განსაკუთრებით ე.წ პირდაპირი დიალოგის შესახებ", - აცხადებს გიგა ბოკერია.

დეპუტატის თქმით, რუსეთი არანაირ პასუხისმგებლობას საკუთარ თავზე არ იღებს და არაფრის შეცვლას არ აპირებს.

"პირიქით, უხარიათ, რომ პოლიტიკური ფასი მათ არ ექნებათ ამ ყველაფერში. კვირიკაშვილის მიმართვას ისინი მომავალშიც გამოიყენებენ ციტირებისას, რომ საქართველომ რაც თქვა, გააკეთოს, ანუ უარი თქვას იმაზე, რომ რუსეთის ფედერაციაა პასუხისმგებელი ამ საზარელ მკვლელობებზე და რომ ჩვენ ორმხრივი ე.წ დიალოგები ვაწარმოოთ სოხუმთან და ცხინვალთან,“- განაცხადა გიგა ბოკერიამ.

რამდენიმე დღის წინ კვირიკაშვილმა რუსეთის ხელისუფლებას განცხადებით მიმართა. მისი თქმით, ქართული მხარე დაინტერესებულია რეალურ პროგრეს მიაღწიონ ჟენევის საერთაშორისო დისკუსიების პროცესში. ასევე, მზადაა პირდაპირი დიალოგისათვის აფხაზებთან და ოსებთან. ამ თვალსაზრისით, პრემიერი მიესალმება რუსეთის კონსტრუქციულ მიდგომასაც.

რუსეთის საგარეო საქმეთა სამინისტრო გიორგი კვირიკაშვილის განცხადებას გამოეხმაურა და განაცხადა, რომ პრემიერ-მინისტრის სურვილს ორმხრივი დიალოგის შესახებ მიესალმებიან.

გაიგეთ მეტი: