რუსეთის საგარეო საქმეთა სამინისტრო პრემიერ-მინისტრის, გიორგი კვირიკაშვილის განცხადებას პასუხობს:

"მოსკოვში საქართველოს პრემიერ-მინისტრის, გიორგი კვირიკაშვილის 9 მარტის განცხადებას ყურადღებით გაეცნენ. კმაყოფილებით აღვნიშნავთ ორმხრივი პროცესის ნორმალიზაციის გაგრძელებისა და გაღრმავების სულისკვეთებას. არავის არ უნდა ეეჭვებოდეს, რომ რუსეთი, როგორც ადრე, მეზობელ საქართველოსთან ურთიერთობის გაჯანსაღებით დაინტერესებულია და მზადაა წავიდეს იმდენად შორს, რამდენადაც თბილისი ამისთვის მზადაა.

გიორგი კვირიკაშვილის მიერ ჟენევის დისკუსიებში ხსენებული სწრაფვა პროგრესისკენ ქართული მხარის კონსტრუქციულობის შესახებ იმედის მომცემია, რაც მარტის ბოლოსთვის დაგეგმილ მორიგ რაუნდს უკავშირდება. დარწმუნებულები ვართ, რომ ასეთი მიდგომა მხარდაჭერილი იქნებოდა მოლაპარაკებების დანარჩენი მონაწილეებითაც, იმისგან დამოუკიდებლად, თუ ვინ უხელმძღვანელებს საქართველოს დელეგაციას.

შეუძლებელია არ მივესალმოთ, ასევე, დეკლარირებულ მისწრაფებას აფხაზეთთან და სამხრეთ ოსეთთან პირდაპირ დიალოგის შესახებ. სწორედ ასეთია ერთადერთი რეალური გზა იმ საკითხების დასარეგულირებლად, რომლებიც საქართველოს აწუხებს და რუსეთ-საქართველოს ორმხრივი დღის წესრიგის ფარგლებს სცილდება. კერძოდ, ეს ეხება ცოტა ხნის წინანდელ საქართველოს მოქალაქე არჩილ ტატუნაშვილთან დაკავშირებულ ინციდენტს, რაც მწუხარებას იწვევს".

პრემიერის განცხადება

რამდენიმე დღის წინ კვირიკაშვილმა რუსეთის ხელისუფლებას განცხადებით მიმართა. მისი თქმით, ქართული მხარე დაინტერესებულია რეალურ პროგრეს მიაღწიონ ჟენევის საერთაშორისო დისკუსიების პროცესში. ასევე, მზადაა პირდაპირი დიალოგისათვის აფხაზებთან და ოსებთან. ამ თვალსაზრისით, პრემიერი მიესალმება რუსეთის კონსტრუქციულ მიდგომასაც.

პრემიერის თქმით, მათ ხელთაა ორი არჩევანი:

"აღნიშნულ თარიღს [აგვისტოს ომის ათი წლისთავს] შევხვდეთ ურთიერთბრალდებებითა დამწვავე განცხადებებით, რომელთა ნაკლებობა ამ წლების განმავლობაში ნამდვილად არ იყო, ან გადავდგათ გონივრული, თუნდაც მცირე ნაბიჯები ამ მოჯადოებული წრიდან ჩვენი ურთიერთობების გამოსაყვანად".

გაიგეთ მეტი: