შინაგან საქმეთა სამინისტროს გენერალურმა ინსპექციამ სუფსის პოლიციის განყოფილების უფროსის მოადგილე ქრთამის აღების ბრალდებით დააკავა.

გამოძიების ინფორმაციით, ბრალდებული, მფარველობის სანაცვლოდ, სისტემატურად იღებდა ფულს მოქალაქე ბ.პ.-სგან, რომელიც სუფსაში მიმდინარე ავტობანის მშენებლობაზე მომუშავე ტრაქტორებიდან საწვავს ფარულად იღებდა და ყიდდა.

გამოძიება საქართველოს სსკ-ს 338-ე მუხლის პირველი ნაწილით მიმდინარეობს, რაც ქრთამის აღებას გულისხმობს. დანაშაული 6-დან 9 წლამდე ვადით თავისუფლების აღკვეთას ითვალისწინებს.