ტელეკომპანია პირველის ჟურნალისტმა ინგა გრიგოლიამ დღეს, 14 მარტს, 2 საათზე, თავისი გადაცემა სპეციალური განცხადებით გამოეხმაურა მის მიმართ შანტაჟის მიზნით გამოთქმულ მუქარას:

"გამარჯობა ჩემო მეგობრებო, გამარჯობა ჩემო მაყურებელო, ვინც იცით და ვინც ჯერ კიდევ არ იცით, დღეს მორიგი ვიდეო გავრცელდა, რომლითაც სხვებთან ერთად ჩემი პირადი ცხოვრების ამსახველი ფარული კადრების გასაჯაროებით დამემუქრნენ, თუ ქვეყანას არ დავტოვებ. მოგესალმებით ყველას, ვინც ბოლო ორ ათწლეულზე მეტია მიყურებთ და მისმენთ მიუხედავად იმისა, მოგწონთ თუ არა ის, რასაც ამდენი წელია ვაკეთებთ. მოგესალმებით თქვენც, ვისაც ასე ძალიან გინდათ, რომ მე ახლა აქ არ ვიჯდე. მოგესალმები შენ, ვისაც ასე ძალიან გინდა, რომ შანტაჟის შიშით ქვეყანა დავტოვო და ჩემს საქმეზე უარი ვთქვა იმიტომ, რომ შენ კომფორტულად იგრძნო თავი. მე ინგა ვარ, გრიგოლია - ქალი, დედა, შვილი და მეგობარი. მყავს არაჩვეულებრივი შეყვარებული, მაქვს სექსი და ასეც ვაპირებ გავაგრძელო ჩემი ცხოვრება. ხოლო თქვენ კი, ვინც ჩემი პირადი ცხოვრების გასაჯაროებით მემუქრებით და მოითხოვთ, რომ ქვეყანა დავტოვო, პირობას გაძლევთ, თავს შევაკლავ ჩემი და სხვა ადამიანების უფლებების დაცვას და ყველაფერს გავაკეთებ იმისთვის, რომ ციხეში მრავალი წლით აღმოჩნდეთ ამ კადრების გადამღებიც და განმახორციელებელიც. წლების წინ მე ჩემი შვილის მოკვლის მუქარამ ვერ გამაჩერა და ვერ გამაჩუმა. ეს გამოუძიებელი საქმე აქამდე გამოუძიებელი იდო სოდში და მე აქამდე ამაზე პირდაპირ ეთერში არასდროს არ მისაუბრია".

ტელეწამყვანის თქმით, ის შანტაჟზე წამოგებას არ აპირებს და ბრძოლას ბოლომდე გააგრძელებს.

დღეს, 14 მარტს, ბოლო ერთი კვირის განმავლობაში უკვე მეორედ გავრცელდა პირადი ცხოვრების ამსახველი კადრები, რომელზეც, სავარაუდოდ, ერთ-ერთი პოლიტიკოსია აღბეჭდილი. ვიდეოს ავტორები რამდენიმე პოლიტიკოსთან ერთად აფრთხილებენ ინგა გრიგოლია, რომ თუ არ შეწყვეტენ საქმიანობას, გაუსაჯაროვებენ პირადი ცხოვრების ამსახველ ფარულ ჩანაწერებს.

11 და 14 მარტს გავრცელებულ ვიდეოებთან დაკავშირებით საქმის გამოძიება სისხლის სამართლის კოდექსის 157-ე მუხლითაა დაწყებული, რაც გულისხმობს პირადი, ან ოჯახური საიდუმლოს ხელყოფას, ანუ მოპოვებას, შენახვას, ან/და გავრცელებას. დანაშაული ისჯება ჯარიმით, ან გამასწორებელი სამუშაოთი 1 წლამდე ვადით, ან პატიმრობით იგივე ვადით.