შინაგან საქმეთა მინისტრის, გიორგი გახარიას თქმით, საოკუპაციო ხაზთან დანაშაულებრივი ქმედებების აღსაკვეთად სახელმწიფოს ძირითადი ბერკეტი საერთაშორისო ფორმატებია. მინისტრის თქმით, მნიშვნელოვანია საზღვარზე უსაფრთხოების ზომების დაცვაც. ამის შესახებ გახარიამ პირველი არხის ეთერში ისაუბრა.

"სახელმწიფოს ძირითადი ბერკეტი რა თქმა უნდა გახლავთ საერთაშორისო ფორმატები, რომლებიც აქტიურად და მაქსიმალურად უნდა გამოვიყენოთ რათა დავიცვათ ჩვენი მოქალაქეები და რა თქმა უნდა ის უსაფრთხოების ზომები, რომლებიც უნდა მივიღოთ გამყოფ ხაზთან. მეს არის ძალზედ მნიშვნელოვანი ჩვენ უკვე დავიწყეთ მუშაობა იმაზე, რომ ეს ზომები იყოს გამკაცრებული, უფრო ეფექტური."

პირველი არხის ჟურნალისტის კითხვას რას აკეთებს სახელმწიფო საზღვრებზე არსებული პრობლემების მოსაგვარებლად მინისტრმა უპასუხა, რომ საზღვრის მართვის მიმართულებით ქვეყანაში ცვლილებებია საჭირო:

"ჩვენი რეგიონი ხდება სულ უფრო და უფრო მეტი რისკების შემქმნელი. რეგიონი გენერირებს საკმაოდ მაღალი ხარისხის რისკებს, ამიტომ რა თქმა უნდა საზღვრის მართვის მიმართულებითაც გარკვეული ცვლილებები არის საჭირო."