მეცნიერები ანტარქტიკის ნახევარკუნძულის უკიდურეს ჩრდილოეთში ადელის ჯიშის პინგვინების უზარმაზარ ჯგუფს გადააწყდნენ. 1,5 მილიონზე მეტი ფრინველი მას შემდეგ აღმოაჩინეს, რაც კოსმოსიდან გადაღებულ ფოტოებზე მათი გუანო (ფეკალიები) უზარმაზარ ლაქებად გამოჩნდა.

კლდოვან არქიპელაგზე პინგვინების პოვნას არავინ ელოდა:

"ეს არის კლასიკური შემთხვევა, როცა აღმოჩენა იქ გელოდება, სადაც ყველაზე ნაკლებად გგონია. ხიფათის კუნძულებზე მოხვედრა საკმაოდ რთულია და აქამდე ადამიანებს დიდად არ მოუნდომებიათ იქ ფეხის დადგმა", - ამბობს მკვლევარი ტომ ჰარტი ოქსფორდის უნივერსიტეტიდან.

ფოტო: T.S.MCCHORD/H.SINGH/NU/WHOI

მეცნიერებმა სპეციალური ალგორთმი გამოიყენეს American Landsat-ის ზონდიდან მიღებულ მონაცემებში პინგვინების სურათების მოსაძებნად. მართალია, თავდაპირველი სურათები ბუნდოვანი იყო, მაგრამ პოტენციური კოლონიების ადგილების დადგენის შემდეგ, მკვლევარებმა საკუთარი ვარაუდი უფრო ხარისხიანი სურათების მეშვეობით გადაამოწმეს.

"ამ კოლონიის მასშტაბებმა პირღია დაგვტოვა", - ამბობს ჰეტერ ლინჩი სტონი ბრუკის უნივერსიტეტიდან, - "ჩვენ გავიფიქრეთ: რასაც ვხედავთ, თუ მართალია, ეს იქნება ადელის პინგვინების ყველაზე დიდი კოლონია მსოფლიოში და ნამდვილად ღირს ექსპედიციის დაგეგმვა მათი რაოდენობის დასაზუსტებლად"

2015 წელს კუნძულზე ექსპედიცია დაიგეგმა, თუმცა ადგილზე მისვლა საკმაოდ რთული აღმოჩნდა. არქიპელაგი ზაფხულშიც კი ყინულის უზარმაზარი ლოდებითაა გარშემორტყმული, რომელთაც გემები საგულდაგულოდ არიდებენ თავს.

პინგვინები დრონების მეშვეობით დათვალეს და საბოლოოდ აღმოჩნდა, რომ "ხიფათის კუნძულებზე" 751 527 წყვილი პინგვინი ბინადრობს.

"ჩვენს პლანეტას, თანამედროვე ტექნოლოგიების მიუხედავად, ბოლომდე მაინც არ ვიცნობთ და კიდევ ბევრი აღმოჩენა გვაქვს გასაკეთებელი", - ამბობენ მეცნიერები.