ოსკარის მფლობელი მსახიობი ნატალი პორტმანი ამბობს, რომ ნანობს 2009 წელს, რეჟისორ რომან პოლანსკის მხარდაჭერ პეტიციაზე ხელმოწერას.

შეგახსსნებთ, რომ პოლანსკი 2009 წელს შვეიცარიის პოლიციამ დააკავა, 1977 წელს 13 წლის სამანტა გეიმერის გაუპატიურების გამო. მაშინ, პოლანსკის დასაცავად, კინოინდუსტრიის ასზე მეტმა წარმომადგენელმა, მათ შორის ჟანა მორომ, პაოლო სორენტინო, ჯუზეპე ტორნატორემ, პედრო ალმოდოვარმა, უეს ანდერსონმა, ფანი არდანმა, მარტინ სკორსეზემ, ვუდი ალენმა, ალეხანდრო გონსალეს ინიარიტუმ, დევიდ ლინჩმა, ტილდა სუინტონმა, დარენ არანოვსკიმ და სხვებმა მიმართვა გაავრცელა.

"ეს დიდი შეცდომა იყო, ჩემს თავზე ვიღებ პასუხისმგებლობას, რომ ხელმოწერამდე არასაკმარისად ვიფიქრე. პეტიცია ჩემთვის ძალზე პატივსაცემმა ადამიანმა გადმომცა და ხელის მოწერა მთხოვა. იმ მომენტში მეგონა, რომ გზააბნეულ ადამიანს თანავუგრძნობდი. ჩვენ სხვა დროში ვცხოვრობდით, სხვა სამყაროში, სადაც ჰოლივუდში დატრიალებული საშინელებები არც კი გაგვეგო, თუმცა, ამით თავის გამართლება დაუშვებელია", - ამბობს ნატალი პორტმანი.

რამდენიმე კვირის წინ პოლანსკის გამართლების გამო ბოდიშის მოხდა მოუწია რეჟისორ კვენტინ ტარანტინოსაც, რომელიც 2003 წლის აუდიოჩანაწერში რომან პოლანსკის მიერ 13 წლის გოგოს გაუპატიურებას ამართლებს და ამბობს, რომ გოგოს თავად სურდა ეს.

ამ ჩანაწერის გავრცელების შემდეგ, ტარანტინომ პოლანსკის მსხვერპლ სამანტა გეიმერს ბოდიში მოუხადა.

"მსურს საჯაროდ მოვუხადო ბოდიში სამანტა გეიმერს The Howard Stern Show-ში გაკეთებული განცხადებების გამო. ვწუხვარ და ბოდიშს ვიხდი, რომ მისი მისამართით ჩადენილი კრიმინალური აქტი სპეკულაციის საგნად ვაქციე. ვწუხვარ, რომ პოლანსკის მიერ 13 წლის გოგოს გაუპატიურებას ვამართლებდი. ახლა, 15 წლის შემდეგ ვაცნობიერებ თუ რა არასწორი ვიყავი მაშინ. სამანტა გეიმერი რომან პოლანსკიმ გააუპატიურა. ვწუხვარ, რომ საბოლოო ჯამში მე ეშმაკის ადვოკატად ვიქეცი და ვცდილობდი პროვოკაციული ვყოფილიყავი. ბოდიშს ვიხდი, რომ სამანტას გრძნობები არ გავითვალისწინე, გულწრფელად ვწუხვარ.

მე არასწორი, საქმეში ჩაუხედავი და უგრძნობი ვიყავი.

დიდი ბოდიში სამანტა", - ნათქვამია კვენტინ ტარანტინოს განცხადებაში.

აღსანიშნავია, რომ პოლანსკი დღემდე ემალება ამერიკის სასამართლოს.