სახელმწიფო უსაფრთხოების სამსახურის საინფორმაციო-ანალიტიკური დეპარტამენტის უფროსის მოადგილემ, კახა ქემოკლიძემ IPRM-ის არაგეგმირი შეხვედრის შემდეგ თქვა, რომ დღევანდელ დღეს, არჩილ ტატუნაშვილის ცხედრის გადმოსვენებაზე დე ფაქტო ხელისუფლებამ ფაქტობრივად უარი განაცხადა.

სუს-ის წარმომადგენლის ცნობით, შეხვედრაზე თქვეს, რომ გადმოსვენებამდე, რუსეთის ფედერაციისგან საექსპერტო დასკვნას ელოდებიან:

"ისინი აცხადებენ, რომ დასაწყისში, როცა ცხედარი დაათვალიერეს, ვერ შეძლეს სიღმისეული ექსპერტიზის ჩატარება და რუსეთის ფედერაციას სთხოვეს, ჩაეტარებინათ საექსპერტო ანალიზი, რაც გარკვეულ დროს მოითხოვს. ჩვენ მოვთხოვეთ, ეს დრო შემცირებულიყო მაქსიმალურად და ცხედარი დაუბრუნებოდა ოჯახს. თუმცა, დე ფაქტო ხელისუფლების განცხადებით, ამ პერიოდმა შეიძლება რამდენიმე დღეს გასტანოს".

კახა ქემოკლიძის თქმით, მათ ევროკავშირის მონიტორინგის მისიასა და დე ფაქტო ხელისუფლებას სთხოვეს, დღის ბოლოს ერთმანეთთან დაუკავშირდნენ ცხელი ხაზით, რათა რუსი ექსპერტებისგან შეიტყონ, რა დრო დასჭირდებათ ექსპერტიზისთვის.

მისივე თქმით, დღევანდელ შეხვედრაზე ქართული მხარის კიდევ ორი მოთხოვნა არ დაკმაყოფილდა - ტატუაშვილთან ერთად დაკავებული ორი პირის გამოშვებისა და ოკუპირებულ ტერიტორიაზე სამხარაულის ეროვნული ბიუროს ექსპერტების გადაყვანა.

სუს-ს მოთხოვნით, დღეს, 26 თებერვალს 15 საათზე, ერგნეთში, ინციდენტების პრევენციის და მათზე რეაგირების მექანიზმის (IPRM) მონაწილეების არაგეგმიური შეხვედრა ჩაინიშნა. განხილვის თემა იყო არჩილ ტატუნაშვილის ცხედრის გადმოსვენება და დაკავებულების - ლევან ქუტაშვილის და იოსებ პავლიაშვილის ცენტრალური ხელისუფლების მიერ კონტროლირებად ტერიტორიაზე უმოკლეს ვადაში გადმოსვლის საკითხები.

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებს, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობს.

ახალგორში არჩილ ტატუნაშვილთან ერთად დაკავებული იყო საქართველოს კიდევ ორი მოქალაქე. სუს-ის ცნობით, ლევან ქუტაშვილი და იოსებ პავლიაშვილი უკვე გაათავისუფლეს.