სტივენ კინგის It-ის მეორე ნაწილში სათამაშოდ, ამერიკელ მსახიობ ჯესიკა ჩესტეინთან მოლაპარაკებები მიმდინარეობს. ის გაზრდილი ბევერლის როლში მოგვევლინება. ამის შესახებ ექსკლუზიურ ინფორმაციას Variety ავრცელებს.

როგორც გამოცემის წყარო იუწყება, ჩესტეინის პროექტში ჩართვაზე მოლაპარაკება წარმატებით მიმდინარეობს. ბევერლის პირველ ნაწილში 16 წლის სოფია ლილი ასრულებდა.

It-ის მეორე ნაწილს Warner Bros. გადაიღებს. ფილმის რეჟისორი კვლავ ენდი მუსკეტი იქნება და სატელევიზიო სცენარსაც ასევე გარი დობერმანი დაწერს. მუსიკეტი სექტემბერში მიცემულ ინტერვიუში აცხადებდა, რომ სიამოვნებით ათამაშებდა ჩესტეინს ბევრლის როლში.

It-ის ახალი ეკრანიზაცია 2017 წლის 7 სექტემბერს გამოვიდა და ამ დროისთვის 478 მილიონი აშშ დოლარის მოგება მოიტანა. ფილმის მეორე ნაწილის გადაღებები 2018 წლის ზაფხულში დაიწყება და კინოთეატრებში 2019 წლის 6 სექტემბერს გამოვა.

კინგის წიგნის მიხედვით, სკოლის მოსწავლეთა გუნდი ჯერ ბავშვობაში, შემდეგ კი დიდობაში ცდილობს პატარა ქალაქის დემონის, კლოუნის სახელად პენივაიზის, განადგურებას.

ფილმის პირველი ნაწილი სწორედ ბავშვებზეა ფოკუსირებული. მეორე ნაწილში კი, მათ დიდობაში ვიხილავთ. თუმცა, როგორც ცნობილია, It-ის ახალ ფილმში პერსონაჟები თავიანთ ბავშვობის სცენებს ხშირად გაიხსენებენ, ასე რომ პირველი ნაწილის მსახიობების ნახვის შანსი მაყურებელს 2019 წლის ფილმშიც ექნება.

It-ის სულ პირველი ეკრანიზაცია 1990 წლის 18 ნოემბერს გამოვიდა.