საქართველოს პარლამენტში ჯანდაცვის კომიტეტის სხდომა მიმდინარეობს, სადაც შრომის უსაფრთხოების შესახებ კანონპროექტი განიხილება. კანონპროექტში გაწერილია კანონის გავრცელების სფეროები და კანონდამრღვევი კომპანიებისთვის სანქციები.

  • მომეტებული საფრთხის შემცველი საქმიანობა რეგისტრაციის გარეშე ისჯება ჯარიმით 1 000 ლარის ოდენობით;
  • ამ დარღვევის გამო მიცემული მითითებების არ შესრულება 2 000 ლარით;
  • ზედამხედველი ორგანოს საქმიანობის ხელისშეშლისთვის პირველ ეტაპზე გაფრთხილებაა გათვალისწინებული, ყოველ შემდეგ შემთხვევაში 2 000 ლარი;
  • საქართველოს მთავრობის მიერ ტექნიკური რეგლამენტით გათვალისწინებული უსაფრთხოების ნორმების დარღვევისთვის, თუ უსფრთხოების ნორმები კრიტიკულად შეუსაბამო არაა, გათვალისწინებულია გაფრთხილება;
  • მიცემული შეუსაბამობის გამოუსწორებლად დატოვებისთვის 100 ათას ლარამდე შემოსავლის მქონე ფიზიკური პირი 100 ლარით დაჯარიმდება, 100 ათასზე მაღალი შემოსავლის მქონე პირი კი - 200 ლარის ოდენობით (თითოეულ ხარვეზზე, თუმცა არაუმეტეს 4 000 ლარით);
  • კომპანია, რომლის შემოსავალიც 100 ათას ლარს არ აღემატება და დღგ-ს იხდის იმავე დარღვევისთვის 200 ლარით ჯარიმდება (თითოეულ ხარვეზზე, თუმცა არაუმეტეს 4 000 ლარით); სანქციები იზრდება შემოსავლების მიხედვით, თუმცა დარღვევისთვის ჯარიმა თითოეულ ხარვეზზე 1 000 ლარს, ხოლო ჯამურად 14 000 ლარს არ აღემატება;
  • მთავრობის მიერ დამტკიცებული ტექნიკური რეგლამენტის შრომის უსაფრთხოების ნორმებთან შეუსაბამობის გამო კომპანიას საქმიანობა უჩერდება 50 000-ლარიანი ჯარიმით ან მის გარეშე;
  • კანონით გათვალისწინებული ვალდებულებების შეუსრულებლობის გამო პირს გააფრთხილებენ, შემდეგ კი დააჯარიმებენ. ჯარიმა 100 ლარიდან იწყება და შემოსავლების მიხედვით იზრდება.

ამავე თემაზე: სფეროების ჩამონათვალი, რომელზეც შრომის უსაფრთხოების შესახებ კანონი გავრცელდება