ჯერ კიდევ 2015 წლის 6 აპრილიდან, ქალაქ თბილისის მუნიციპალიტეტის საკრებულოს დადგენილების თანახმად, ნებისმიერი შინაური ცხოველის პატრონს კანონისა და საკუთარი ოთხფეხა მეგობრის წინაშე გარკვეული ვალდებულებები აკისრია.

სამწუხაროდ, კანონით განსაზღვრული ვალდებულებების მიუხედავად, უამრავი ადამიანი ჯერ კიდევ ვერ იაზრებს საკუთარ პასუხიმგებლობას თავისივე შინაური ცხოველის მიმართ.

რა არის ყველაზე მნიშვნელოვანი? თითოეული ჩვენგანი ვალდებულია ცხოველი უზრუნველყოს უსაფრთხო საცხოვრებელი პირობებით, საკვებით და საჭიროების შემთხვევაში საჭირო სამედიცინო დახმარებაც აღმოუჩიოს.

შინაური ცხოველის ფლობისათვის კანონით განსაზღვრული სხვა აუცილებელი პირობებიც არსებობს და აი ისინიც:

1. პატრონის სტატუსი

ცხოველის მოვლა-პატრონობასა და გარკვეულ პასუხისმგებლობაზე საუბრის დაწყებამდე, მნიშვნელოვანია განისაზღვროს ცხოველის პატრონის მინიმალური ასაკი. 16 წლამდე პირს ცხოველის პატრონის სტატუსი ვერ მიენიჭება, თუ არ აქვს მშობლის წერილობითი თანხმობა.

2. ცხოველისაგან მომდინარე საფრთხეები

პატრონი ვალდებულია, პასუხისმგებლობა აიღოს საკუთარი ცხოველისაგან მომდინარე ნებისმიერ საფრთხეზე, რომელიც შეიძლება ნებისმიერ სხვა ცხოველს ან ადამიანს დაემუქროს. მოკლედ რომ ვთქვათ, თქვენი ოთხფეხა მეგობრის დანაშაულზე თქვენ ხართ პასუხისმგებელი.

3. კარგი პატრონი

საუკეთესო პატრონად ჩაითვლებით, თუ სათანადოდ იზრუნებთ თქვენი ცხოველის გამოკვებაზე, კომფორტულ ცხოვრებაზე, სათანადო ფიზიკურ დატვირთვასა და ჰიგიენაზე.

5. მეტისი

საინტერესოა ისიც, რომ კანონის მიხედვით, მეტისის, ანუ ნარევი ჯიშის ცხოველის მეპატრონე ვალდებულია, ნებისმიერი უვნებელი მეთოდით (იგულისხმება სტერილიზაცია/კასტრაცია) მისი გამრავლების შესაძლებლობა შეწყვიტოს.

6. ძაღლების ჩხუბი

ისევე, როგორც მთელ მსოფლიოში, ცხოველების ჩხუბები საქართველოშიც აქტუალური პრობლემაა და ისჯება კიდეც.

7. ძაღლის გასეირნება საზოგადოებრივ თავშეყრის ადგილებში

ძაღლის საზოგადოებრივ თავშეყრის ადგილებში გასეირნება (დეკორატიური ჯიშის ძაღლების გარდა) თუ საზოგადოებრივი ტრანსპორტით ერთი ადგილიდან მეორეზე გადაყვანა 07:00 – 23:00 საათების პერიოდში მხოლოდ მოკლე საბმელით ან სპეციალური კონტეინერით არის ნებადართული.

8. მკურნალობა და პროფილაქტიკა

მიუხედავად იმისა, ავადმყოფობს თუ არა თქვენი ცხოველი, წელიწადში ერთხელ მისი ვეტერინარული შემოწმება აუცილებელია. რომელიმე დაავადების აღმოჩენის შემთხვევაში კი სათანადო მკურნალობა უნდა უზრუნველყოთ.

9. საზოგადოებრივი სივრცის დასუფთავება

თუ ძაღლის პატრონი ხართ, დღეში რამდენჯერმე მისი გასეირნება თქვენთვის უცხო არ იქნება, ასეთ დროს საზოგადოებრივი ადგილების თქვენი ცხოველის მიერ დაბინძურების შემთხვევაში ვალდებული ხართ, დაასუფთავოთ სივრცე, ამიტომ გირჩევთ, რომ პატარა ცელოფანი ყოველთვის თან იქონიოთ. გამვლელები დიდ მადლობას გეტყვიან.

10. სიყვარული და მზრუნველობა

ბოლოს კი, არა კანონის, არამედ ჩვენი სახელით მოგიწოდებთ, რომ გიყვარდეთ თქვენი ოთხფეხა მეგობრები. გახსოვდეთ, ოჯახის ახალ წევრზე პასუხისმგებლობის აღების შემდეგ, მათი ბედნიერება მთლიანად თქვენზეა დამოკიდებული.