ორი მარტიდან პირველ არხზე ორიგინალური საბავშვო მუსიკალური კონკურსი, "რანინა" დაიწყება, რომელში მონაწილეობასაც 8-დან 13 წლამდე შემსრულებლები იღებენ.

რა ელის გამარჯვებულს?

"რანინას" გამარჯვებული, ტიტულთან ერთად, იღებს ახალ პასუხისმგებლობას - ხდება საქართველოს ხმა ევროვიზის საბავშვო კონკურსზე 2018 წელს.

მეორე ადგილის მფლობელი - ევროვიზიაზე გაემგზავრება სპიკერის სტატუსით (ქართველი კონკურსანტის წარმდგენი).

მესამე ადგილის მფლობელი - ევროვიზიაზე გაემგზავრება სტუმრის სტატუსით.

პროექტის შესახებ

"რანინას" ავტორი ლანა ქუთათელაძეა.

წამყვანი: პიანისტი დავით ალადაშვილი

თანაწამყვანი: ანო თაკალანძე

"რანინას" კონკურსანტები ისეთ მუსიკალურ ბარიერებს გადალახავენ, როგორიც ჯერ არც ერთ კონკურსში, არავის გადაულახავს.

რაც მთავარია, "რანინა" თავიდან ბოლომდე ქართული პროექტია.

სწორედ ამიტომ, შოუს ძირითადი ნაწილი სწორედ ქართველ კომპოზიტორებს და მათ შემოქმედებას დაეთმობა.

გამომდინარე იქიდან, რომ გამარჯვებული საერთაშორისო კონკურსზე, ევროვიზიაზე მიემგზავრება, მნიშვნელოვანია არაქართული რეპერტუარის შესრულების უნარებიც. ამიტომ "რანინა" ასევე მოიცავს უცხოურ მუსიკალურ ტურებსაც.

პროექტის წესები

პროექტში მონაწილეობს 10 კონკურსანტი, რომლებიც გადიან - 3 თვიან მუსიკალურ ტელე-მარათონს. კონკურსი მოიცავს - 4 მუსიკალურ თემატურ ტურს. თითოეული ტური იყოფა - 2 ტელე ეპიზოდად. ძირითად ტურებს გადის ყველა მონაწილე, 5 მათგანი გადადის ნახევარფინალებში. ფინალში გამარჯვებისთვის იბრძვის 3 კონკურსანტი. თითოეულ მუსიკალურ ტურს მონაწილეები გადიან ორკესტრთან, მუსიკალურ ჯგუფებთან, ბენდებთან, ან ცნობილ მომღერლებთან ერთად.

თითოეულ ტურზე კონკურსანტებს აფასებს ჟიური, რომელიც 3 წევრისგან შედგება, ეს შემადგენლობა თითოეული ტურის დროს იცვლება.

კონკურსანტის სიმღერის დროს, ჟიურის წევრები, ეკრანებზე 4 კატეგორიაში: ვოკალი, შესრულება, არტისტიზმი, კოლაბორაცია - 10 ბალიანი სისტემით აფიქსირებენ საკუთარ შეფასებას. სიმღერის დასრულებამდე 10 წამის განმავლობაში შეაქვთ კორექტივები, ათვლის დასრულებისას კი საბოლოო ქულები ფიქსირდება.

მონაწილეები 4 ძირითადი ტურის განმავლობაში აგროვებენ ჟიურის მიერ დაწერილ ქულებს. საბოლოო რეიტინგით ირჩევა ნახევარფინალის ხუთეული.

ნახევარფინალურ ეტაპზე ჟიურის თითოეული წევრი ადგენს საკუთარ რეიტინგს. 2 ნახევარფინალის საერთო რეიტინგის მიხედვით გამოვლინდება 3 ფინალისტი.

3 ფინალისტს შორის გამარჯვებულს 3 კაციანი ჟიური აირჩევს.

"რანინა" ეთერში 2 მარტიდან გავა, კვირაში ერთხელ, პარასკევს 20:00 საათზე.