საქართველოს სტატისტიკის ეროვნული სამსახურის ინფორმაციით, ინფლაციის დონემ 2016 წლის ივნისში წინა თვესთან შედარებით -0,9 პროცენტი შეადგინა, წლიური ინფლაციის მაჩვენებელი კი 1,1 პროცენტია. 2010 წლის საშუალოს მონაცემებთან შედარებით სამომხმარებლო ფასების ინდექსი კი 15,5 პროცენტით გაიზარდა.

ინფლაციის თვიური მაჩვენებლის ფორმირებაზე გავლენა იქონია ფასების ცვლილებამ სურსათსა და უალკოჰოლო სასმელზე. კერძოდ, ჯგუფში ფასები შემცირდა 2,6 პროცენტით, რაც ინფლაციის მთლიან მაჩვენებელზე -0,79 პროცენტული პუნქტით აისახა.

გარდა ამისა, აღნიშნულ პერიოდში ინფლაციის მაჩვენებელზე გავლენა იქონია ტრანსპორტის ფასების ცვლილებამ. კერძოდ, ამ ჯგუფში ფასების 1,7-პროცენტიანი მატება დაფიქსირდა, რაც 0,19 პროცენტული პუნქტით აისახა თვიური ინფლაციის მთლიან მაჩვენებელზე. ფასების მნიშვნელოვანი ზრდა დაფიქსირდა სატრანსპორტო მომსახურებაზეც (2,2 პროცენტი).

ფოტო: საქსტატი

რაც შეეხება ინფლაციის წლიურ მაჩვენებელს, მის ფორმირებაზე გავლენა იქონია ალკოჰოლური სასმელებისა და თამბაქოს ჯგუფში ფასების 11,6 პროცენტით გაზრდამ, რაც ინფლაციის მთლიან მაჩვენებელზე 0,71 პროცენტული პუნქტით აისახა.

გარდა ამისა აღნიშნულ პერიოდში ინფლაციის მაჩვენებელზე გავლენა იქონია საცხოვრებელი სახლი, წყალი, ელექტროენერგია, აირი და სათბობის სხვა სახეების ჯგუფში ფასების ცვლილებამ. კერძოდ, ჯგუფში დაფიქსირდა ფასების 6,1-პროცენტიანი მატება, რაც ინფლაციის მთლიან მაჩვენებელზე 0,51 პროცენტული პუნქტით აისახა.

ამავე პერიოდში, ინფლაციის მაჩვენებელზე აისახა ასევე ჯანდაცვისა და ტრანსპორტის ჯგუფებში ფასების ცვლილებაც. კერძოდ, ფასები გაიზარდა 4,3 პროცენტით, რაც ინფლაციის მთლიან მაჩვენებელზე 0,41 პროცენტული პუნქტით აისახა

ამასთან, ფასების 9,5-პროცენტიანი კლება დაფიქსირდა ტრანსპორტის ჯგუფზე, რაც -1,16 პროცენტული პუნქტით აისახა წლიური ინფლაციის მთლიან მაჩვენებელში.