საზოგადოებრივი მაუწყებლის თვითრეგულირების საბჭომ მაუწყებელს დაავალა, რომ ზვიად რატიანზე გავრცელებული ვიდეო ყველა პლატფორმიდან აიღოს. მაუწყებელს ფრაგმენტული ვიდეო შსს-მ მიაწოდა და მასზე ზვიად რატიანის დაკავებაა ასახული.

საბჭოს გადაწყვეტილების მიუხედავად რატიანის ვიდეო ჯერ კიდევ არ წაშლილა. საზოგადოებრივი მაუწყებლის მედიისა და კომუნიკაციის ბლოკის დირექტორმა, თიკო ბერძენიშვილმაOn.ge-ს უთხრა, ვიდეოს აღება იურიდიულ პროცედურებთან არის დაკავშირებული. მისი თქმით, გადაწყვეტილება რატიანის ადვოკატს უკვე ჩაბარდა და თუ ის არ გაასაჩივრებს, ჩანაწერს 7 დღის შემდეგ აიღებენ.

როგორც საბჭოს წევრმა, ია ანთაძემ On.ge-ს უთხრა, ჩანაწერის აღების გადაწყვეტილება მათ რატიანის უფლებების გრძელვადიანი პერეპექტივიდან გამომდინარე მიიღეს. მისივე თქმით, ვიდეო პირველ არხზის ვებგვერდზე კანონიერად განთავსდა.

პოეტმა ზვიად რატიანმა საზოგადოებრივ მაუწყებელს თვითრეგულირების საბჭოში 12 იანვარს უჩივლა. მისი მოთხოვნები იყო:

  • დადგინდეს მაუწყებელთა ქცევის კოდექსის მოთხოვნათა - პირადი ცხოვრების ხელშეუხებლობის პრინციპისა და ჯეროვანი სიზუსტის დარღვევა საზოგადოებრივი მაუწყებლის სადავო მასალებში;
  • საზოგადოებრივი მაუწყებლის ყველა პლატფორმიდან (მაგ. ვებგვერდი, YouTube არხი, facebook გვერდი) სადავო მასალების აღებას;
  • მომავალში აღარ გამოიყენოს სადავო ჩანაწერები საზოგადოებრივმა მაუწყებელმა.

ზვიად რატიანია საქმე

პოეტი ზვიად რატიანი ე.წ. რეიდების დროს დააკავეს. მას სამართალდამცავები წინააღმდეგობის გაწევასა და წვრილმან ხულიგნობას ედავებოდნენ. რატიანი კი პოლიციელებს ცემაში ადანაშაულებს. საბოლოოდ სასამართლომ მას 2 000-ლარიანი ჯარიმა დააკისრა.

საზოგადოებრივმა მაუწყებელმა 27 დეკემბერს ვებგვერდზე, შემდეგ კი საინფორმაციო გამოშვებაში ზვიად რატიანის საქმეზე გამოაქვეყნა შსს-ს ვიდეომასალა, რომელიც სასამართლომ მტკიცებულებად მიიღო. გამოქვეყნებული ვიდეო დამონტაჟებულია. იგივე მასალა On.ge-მაც მოითხოვა შსს-სგან, თუმცა ამ დრომდე არ მიუღია.

ჩანაწერის გამოქვეყნების შემდეგ, მწერლებისა და გამომცემლების ჯგუფი საზოგადოებრივი მაუწყებლის სამეურვეო საბჭოს შეხვდა და მენეჯმენტის გათავისუფლება მოსთხოვა.

ჟურნალისტური ეთიკის ქარტიის საბჭოს გადაწყვეტილებით, ვიდეოს გამოქვეყნებით, საზოგადოებრივი მაუწყებლის ახალი და მიმდინარე ბლოკის დირექტორმა გიორგი გვიმრაძემ და ვებსაიტის რედაქტორმა ირინა დეკანოიძემ ქარტიის პირველი და მეათე პრინციპები დაარღვიეს.