ტრანსგენდერი ქალი მირანდა ფაღავა აცხადებს, რომ დღეს, 28 იანვარს დაახლოებით 04:00-დან 05:30 საათამდე ვაკის პარკის მიმდებარე ტერიტორიაზე მისთვის უცნობმა პირმა სცემა.

როგორც ფაღავა Facebook-ზე წერს, მარკეტში ფულის დასახურდავებლად შესვლისას უცხო პირმა დაუძახა და მასთან მისვლა სთხოვა. ფაღავას თქმით, თხოვნა დაჟინებულ მოთხოვნაში გადაიზარდა, შემდეგ კი ბრაზსა და ყვირილში. პოლიციაში მაშინვე ვერ დარეკა, რადგან ტელეფონი დამჯდარი ჰქონდა:

"გამომყვა და არ მომცა საშუალება ტაქსიში ჩავმჯდარიყავი, ვუთხარი რომ ტაქსის გადავიხდიდი და მივბრუნდებოდი, როცა გადავუხადე მოვბრუნდი, რადგან ამ პიროვნებამ მითხრა ჩემი მისამართი და დამემუქრა, რომ სახლში დამადგებოდა, მე მინდოდა, რომ სიტუაცია განმემუხტა."

ფაღავა წერს, რომ კაცმა მიახლოებისთანავე დაარტყა, შემდეგ კი გინებისა და ტრანსფობიური შეძახილების ფონზე, მარკეტის შესასვლელში მდგარი რკინის დაფა აიღო და რამდენჯერმე ჩაარტყა:

"ამასობაში მანქანიდან გადმოვიდა ტაქსის მძღოლი, რომელმაც მომიყვანა და მოძალადე შეაკავა. იქაურობას გავერიდე, სახე დასიებულ-დასისხლიანებული მქონდა, ქუთუთოზე მაქვს ღია ჭრილობა, დაახლოებით 2-3 სმ. შიშისგან ვკანკალებდი და ვტიროდი, ტანსაცმელი შემოხეული მქონდა."

ტრანსგენდერმა ქალმა იქვე მდგარ ჯიხურების გამყიდველებს სთხოვა პატრულისა და სასწრაფო დახმარების გამოძახება, თუმცა დახმარებაზე ყველამ უარი თქვა. ფაღავამ 50 მეტრის მოშორებით დაცვის პოლიციის მანქანა შენიშნა და მისი მიმართულებით წავიდა:

"დაცვის თანამშრომლები უკვე მანქანაში სხდებოდნენ, როგორც კი მოძალადემ დამინახა ეგრევე გამოიქცა ჩემსკენ გინებით, ყვიროდა რომ მომკლავდა, მივედი დაცვის თანამშრომლებთან და ვთხოვე რეაგირება მოეხდინათ და დავეცავი მოძალადისგან, დამცინავი გამომეტყველებით მითხრეს რომ მათ კომპეტენციაში არ შედის ეს და გამომეძახებინა საპატრულო პოლიცია, დამტოვეს იქვე."

ფაღავა წერს, რომ არ ახსოვს როგორ, თუმცა მოგვიანებით ერთ-ერთ შენობაში მოხვდა, სადაც პატრული და სასწრაფო გამოიძახეს და პირველადი დახმარება აღმოუჩინეს. საავადმყოფოში გადაყვანაზე უარი თქვა, რადგან ფიქრობს, იქ ჰომოფობიურად განწყობილი ექიმები დახვდებოდნენ. მისივე ინფორმაციით, პოლიციამ მოძალადე დააკავა.