ადამიანის უფლებათა ცენტრი იყო ორგანიზაცია, რომელიც აჰმედ ჩატაევის უფლებებს იცავდა, რუსთავი 2-თან საუბარში კი მისი აღმსარულებელი დირექტორი, ალეკო ცქიტიშვილი განმარტავს, რომ ჩატაევის ტერორისტულ დაჯგუფებებთან კავშირის შესახებ ინფორმაცია არ ჰქონდათ:

"ჩანდა, რომ ეს იყო ფალსიფიცირებული საქმე. ამის შემდეგ თვითონ პროკურორმა მოითხოვა, რომ აჰმედ ჩატაევის მიმართ წაყენებული ბრალდება მოეხსნათ და მოითხოვა, რომ ის გაეთავისუფლებინათ".

საინფორმაციო სააგენტო Reuters თურქულ პროსახელისუფლებო გაზეთ Yeni Safak-ზე დაყრდნობით წერს, რომ ათათურქის აეროპორტზე თავდასხმის ორგანიზებაში შესაძლოა ერთ-ერთი ეჭვმიტანილი იყოს რუსეთის მოქალაქე აჰმედ ჩატაევი. თუმცა, თურქეთის ხელისუფლებამ Reuters-ს აღნიშნული ინფორმაცია ოფიციალურად არ დაუდასტურა.

ჩატაევი 2012 წლის სექტემბერში ე.წ. ლაფანყურის სპეცოპერაციაში იღებდა მონაწილეობას, რის გამოც ის დააკავეს. ხელისუფლების ცვლილების შემდეგ ის ჯერ გირაოთი გაათავისუფლეს, შემდეგ კი, 2013 წლის 18 იანვარს, პროკურატურამ მის მიმართ სისხლის სამართლებრივი დევნა შეწყვიტა. აჰმედ ჩატაევი მალევე გაემგზავრა ავსტრიაში, სადაც მას ლტოლვილის სტატუსი ჰქონდა.