რუსეთის საელჩო დიდ ბრიტანეში BBC-ის სერიალ McMafia-ს აკრიტიკებს და ამბობენ, რომ ის მაყურებელს რუსეთისა და რუსი ხალხის მიმართ ნეგატიურად განაწყობს.

"BBC და მათი სერიალი ხელს უწყობს სტერეოტიპების გაღრმავებას. McMafia-ში რუსი ხალხი გამოყვანილია, როგორც განგსტერული და კრიმინალური კულტურის მქონე ერი. იმედი გვაქვს, რომ მაყურებელი ამ კლიშეებს არ აყვება", - წერია საელჩოს განცხადებაში.

BBC-ის ამ ეტაპზე რუსეთის საელჩოს კრიტიკაზე კომენტარი არ გაუკეთებია.

McMafia-ში, რომელიც ეკრანზე 2018 წელს გამოვიდა, ერთ-ერთ მთავარ როლს მერაბ ნინიძე ასრულებს.

სერიალის სიუჟეტი გლობალური მაფიის ისტორიას მოგვითხრობს. ინგლისში გაზრდილი რუსული მაფიოზური ოჯახის წევრი საკუთარი წარსულისგან გაქცევას და ახალი ბიზნესის დაწყებას ცდილობს. თუმცა წარსულისგან თავის დაღწევას ტრაგიკული შემთხვევა არ აცდის, რომელიც მას კრიმინალურ სამყაროში დაბრუნებისა და საყვარელი ადამიანების დაცვისკენ უბიძგებს.

სერიალის სცენარი მიშა გლენის ბესტსელერი წიგნის მიხედვით ჰუსეინ ამინმა და ჯეიმს უოტკინმა შექმნეს.