ონლაინ მაღაზიაში შვედური ტანსაცმლის ბრენდის H&M-ის მიერ შავკანიანი მოდელის ფოტოს, რომელსაც ტანსაცმელზე "ჯუნგლების ყველაზე მაგარი მაიმუნი" ეწერა, კრიტიკა მოჰყვა.

ბრენდი რასიზმში დაადანაშაულეს. ჰუდის სტაფილოსფერი ვერსია თეთრკანიან ბავშვს აცვია, წარწერით - "ჯუნგლებში გადარჩენის ექსპერტი".

"H&M ეს მიუღებელი, შეურაცხმყოფელი და რასისტულია. რატომაა თეთრკანიანი ბავშვი "ჯუნგლებში გადარჩენილი" და შავკანიანი "ჯუნგლების ყველაზე მაგარი მაიმუნი"? როგორ იფიქრეთ, რომ ეს სწორი არჩევანია? წაშალეთ, რადგან ეს უსიამოვნოა" - წერს ერთი მომხმარებელი.

H&M-მა ფოტო ონლაინ მაღაზიებიდან აიღო და Time-თან საუბრისას, საჯარო ბოდიშიც მოიხადა, თუმცა ბრენდი ჰუდებს ამერიკის გარდა სხვა ქვეყნებში მაინც გაყიდის:

"ბოდიშს ვიხდით ამ სურათის გამო. ის ჩვენი საიტებიდან უკვე ავიღეთ და ამერიკაში ამ ზედას არ გავყიდით. ჩვენ გვჯერა მრავალფეროვნების და აუცილებლად განვიხილავთ შიდა საქმიანობებს".

ფოტოს გავრცელების შემდეგ, კანადელმა მუსიკოსმა The Weeknd-მა ბრენდთთან სამუშაო კონტრაქტი გაწყვიტა.

"დილით გავიღვიძე და ამ ფოტოს გამო შოკირებული ვიყავი. შემრცხვა და ძალიან შეურაცხყოფილი ვარ და H&M-თან მუშაობის გაგრძელებას აღარ ვაპირებ" - დაწერა მან.

The Weeknd-მა ბრენდთან თანამშრომლობა 2017 წლის გაზაფხულზე დაიწყო და 2017 წლის შემოდგომის კოლექციისთვის დიზაინი შექმნა.