მსოფლიოს 2016 წლის მშვიდობის ინდექსის მიხედვით, 163 ქვეყანას შორის, საქართველო 85-ე ადგილზეა.

მსოფლიოს მშვიდობის ინდექსი კვლევითმა ინსტიტუტმა Vision of Humanity-მ გამოთვალა და საქართველოს 2,057 ქულა მიანიჭა კუბის, ტრინიდადი და ტობაგოს, ბანგლადეშის, საბერძნეთისა და ბოლივიას შემდეგ.

კვლევის მიხედვით, რაც უფრო მაღალია აღნიშნული ინდექსის მაჩვენებელი, მით უფრო დაბალია ქვეყანაში მშვიდობის დონე.

ამერიკის შეერთებული შტატები, საქართველოს მსგავსად, საშუალოდ მშვიდობიან ქვეყანათა რიცხვში მოხვდა 2,154 ქულით.

ყველაზე მშვიდობიან ქვეყნებში 11 ქვეყანა განისაზღვრა, მათ შორის ისლანდია, დანია, ავსტრია, ახალი ზელანდია, პორტუგალია, ჩეხეთი, შვეიცარია, კანადა, იაპონია, სლოვენია და ფინეთი.

იმ ქვეყნების რიცხვში კი, სადაც ყველაზე ნაკლებადაა დღეს მშვიდობა, რუსეთი, ნიგერია, ჩრდილოეთ კორეა, კონგოს დემოკრატიული რესპუბლიკა, პაკისტანი, ლიბია, სუდანი, უკრაინა, ცენტრალური აფრიკის რესპუბლიკა, იემენი, სომალი, ავღანეთი, ერაყი, სამხრეთ სუდანი და სირია მოხვდნენ .

მშვიდობის ინდექსი სხვადასხვა კრიტერიუმების მიხედვით ყალიბდება და ეს კრიტერიუმებია ქვეყანაში კრიმინალის აღქმა, უსაფრთხოების ოფიცრებისა და პოლიციის გამართული მუშაობა, ჰომიციდი, პატიმართა რაოდენობა, იარაღზე წვდომა, შიდა კონფლიქტების ინტენსივობა, ძალადობრივი დემონტრაციები, ძალადობრივი დანაშაული, პოლიტიკური არასტაბილურობა, იარაღის იმპორტი, ტერორიზმის გავლენა და ა.შ.