პარლამენტში ევროპულ საქართველოსთან შეხვედრისას პრემიერ-მინისტრმა გიორგი კვირიკაშვილმა განაცხადა, რომ აზერბაიჯანელი ჟურნალისტის, აფგან მუხტარლის საქმე სერიოზული ჩავარდნაა.

ევროპული საქართველოს ერთ-ერთმა ლიდერმა, ელენე ხოშტარიამ მუხტარლის ჩევენების ნაწილი წაიკითხა, რომელში ჟურნალისტი პრემიერს მოკითხვას უთვლის და ამბობს, რომ მან და შს მინისტრმა სახელმწიფო დონეზე დანაშაული ჩაიდინეს.

"ჩემთვის მოცემულობად ვერ აღიქმება, ბატონი მუხთარლის მიერ მიცემული ჩვენება. ამიტომ, მე არ მაქვს უფლება ამაზე რაიმე კომენტარი გავაკეთო. საუბარია პოლიტიკურ კომენტარზე", - თქვა კვირიკაშვილმა.

პრემიერ-მინისტრის თქმით, რეაგირება, რომელიც მუხტარლის საქმეს მოყვა იყო ადეკვატური, კონტრდაზვერვის სამსახურის უფროსი და სასაზღვრო პოლიციის უფროსი გათავისუფლდნენ.

"კიდევ ერთხელ ვამბობ, რომ მათი ბრალეულობა არ არის ჯერჯერობით დადასტურებული, მაგრამ მათ აიღეს პოლიტიკური პასუხისმგებლობა ამ შემთხვევაზე. გამოძიება წინ არის, ჩვენ მივმართეთ შუამდგომლობით აზერბაიჯანის სამართალდამცველ უწყებებს, რომ გაცვლილი იქნას მაქსიმალურად ინფორმაცია. ჯერჯერობით რა შედეგი დაიდება გამოძიების შედეგად, არავინ შეიძლება იწინასწარმეტყველოს".

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.

მუხტარლის დაკავებიდან რამდენიმე კვირაში, აზერბაიჯანის მმართველი გუნდის პარლამენტარმა ელმან ნასიროვმა რადიო თავისუფლებასთან ინტერვიუში თქვა, რომ მუხტარლის დაკავება აზერბაიჯან-საქართველოს სპეცსამსახურების წარმატებული ოპერაცია იყო.