თუ გეგონათ, რომ ჰარვი ვაინშტაინის მისამართით გაკეთებული განცხადებები დასრულდა, შემცდარხართ, რადგან ყველაფერი თავიდან დაიწყო.

ჰოლივუდის ვარსკვლავმა სელმა ჰაიეკმა New York Times-ში საკუთარი წერილი გამოაქვეყნა, რომელშიც ჰარვი ვაინშტეინის მხრიდან სექსუალურ შევიწროებაზე წერს და ამბობს, რომ ჰარვი წლების განმავლობაში მისი პირადი მონსტრიც იყო.

როგორც სელმა ყვება, ყველაფერი 2002 წელს დაიწყო, როდესაც მას ფილმში, Frida, იღებდნენ. კინოსურათში ჰაიეკი ლეგენდარული მექსიკელი მხატვრის ფრიდა კალოს როლს ასრულებდა და ოსკარიც დაიმსახურა.

მსახიობის თქმით, მას ხშირად უხდებოდა უარის თქმა ვაინშტაინის შეთავაზებაზე ერთად შხაპის მიღების, ორალური სექსის, მასაჟის და სექსის შესახებ.

ჰაიეკი იხსენებს იმასაც, რომ ჰარვი მას სხვა ქალთან ეროტიკულ სცენაში გადაღებას სთხოვდა, რის გამოც მსახიობს ნერვული შეტევა დაემართა. ჰაიეკის თქმით, მდგომარეობიდან გამოსვლაში მას კოლეგები და მეგობრები - ეშლი ჯადი, ედუარდ ნორტონი და ანტონიო ბანდერასი დაეხმარნენ.

ეშლი ჯადი, რომელიც ჰაიეკს ჰარვი ვაინშტაინის მხრიდან ზეწოლის შემდეგ მდგომარეობიდან გამოსვლაში ეხმარებოდა, იყო პირველი ვინც გაბედა და ჰარვის შესახებ ხმამაღლა დაიწყო საუბარი, სწორედ მისი დამსახურებით დასრულდა გავლენიანი პროდიუსერის კარიერა.

სელმა ჰაიეკი იხსენებს იმასაც, რომ ჰარვი ვაინშტაინი მას ერთხელ დაემუქრა და უთხრა, რომ მისი მოკვლა და გაქრობა არ გაუჭირდებოდა.

გაიგეთ მეტი: ჰარვი ვაინშტაინის საქმე