იმის წინასწარმეტყველება, თუ რას ფიქრობს რეალურად რუსეთის პრეზიდენტი ვლადიმერ პუტინი, არა მხოლოდ მისი ქვეყნის მომავლისთვისაა მნიშვნელოვანი, არამედ - მთელი მსოფლიოსათვის. სულ ახლახანს, პუტინმა თავისი ემოციები გააზიარა ხელოვნურ ინტელექტზე, რომელმაც დააინტრიგა და საგონებელში ჩააგდო ექსპერტები.

ხელოვნური ინტელექტი პუტინისა და არკადი ვოროჟის დიალოგში გამოჩნდა, რომელიც რუსული ტექნიკური გიგანტის, იანდექსის მფლობელია. როდესაც ვოროჟი ხელოვნური ინტელექტის პოტენციალს უხსნიდა, პუტინს მის მიმართ დადებითი ზრახვები არ ეტყობოდა. მან იკითხა: „როდის შეგვჭამს ხელოვნური ინტელექტი?“

ვოროჟი მოულოდნელმა კითხვამ დააბნია და ცოტა ხანში უპასუხა: „იმედი მაქვს, არასოდეს“, და მიანიშნა, რომ ხელოვნური ინტელექტი უბრალოდ სხვა დამხმარე ხელსაწყოა.

„პირველად არ ხდება, როდესაც მანქანა ადამიანზე უკეთესად ასრულებს საქმეს. ექსკავატორი უფრო უკეთ თხრის, ვიდრე ადამიანი. მაგრამ ექსკავატორები არ გვჭამენ. მანქანა ჩვენზე სწრაფად მოძრაობს...“ - აღნიშნა ვოროჟმა.

თუმცა, ამის მიუხედავადაც, პუტინი მთლად დარწმუნებული არ ჩანდა. მან თქვა, რომ „ისინი არ ფიქრობენ“, რითაც მიანიშნა, რომ ექსკავატორი მოაზროვნე არ არის, ხოლო ხელოვნური ინტელექტი - იქნება.

პუტინს აქამდეც დაუდასტურებია კაცობრიობის მომავლისა და გლობალური პოლიტიკისთვის ხელოვნური ინტელექტის მნიშვნელობა. როდესაც მოსწავლეებს მეცნიერებაზე ესაუბრებოდა პირველ სექტემბერს, რუსული სკოლის დასაწყისში, პუტინმა თქვა, რომ „მომავალი ხელოვნურ ინტელექტს ეკუთვნის“. პუტინის თანახმად, რომელი ერიც წინ იქნება ტექნოლოგიურად, მსოფლიოს მართვას შეძლებს.

„ხელოვნური ინტელექტი მომავალია არა მხოლოდ რუსეთისათვის, არამედ - მთელი კაცობრიობისთვის. მას კოლოსალური შესაძლებლობები აქვს, თუმცა, ასევე შეიცავს ისეთ საფრთხეებს, რომელთა წინასწარმეტყველება რთულია. ვინც გახდება ამ სფეროს ლიდერი, გახდება მსოფლიოს მმართველი“. - ამბობს პუტინი.

პუტინმა 45 წუთიანი ღია გაკვეთილის განმავლობაში ასევე თქვა, რომ ხელოვნური ინტელექტის სფეროს მონოპოლიზაცია არავინ არ უნდა მოახდინოს. მან თავის სიტყვაში ისიც ახსენა, რომ რუსეთმა სხვებსაც უნდა გაუზიაროს, რაც ისწავლა ამ სფეროში.

„თუ ჩვენ გავხდებით ლიდერები ამ სფეროში, ჩვენ ყველაფერს გავუზიარებთ მთელ მსოფლიოს ისევე, როგორც ვუზიარებთ ჩვენს ბირთვულ ტექნოლოგიებს“ - ამბობს ის.

პუტინის სიტყვებმა კი ილონ მასკის შეშფოთება გამოიწვია, რომელიც მუდმივად გვაფრთხილებს მომავალი ხელოვნური ინტელექტის საფრთხეზე. ტვიტერზე მასკმა დაწერა, რომ ხელოვნური ინტელექტის სფეროში პირველობისთვის მესამე მსოფლიო ომი დაიწყება.

როდესაც პუტინი იანდექსის სათავო ოფისს ესტუმრა, კომპანიის მიერ შექმნილი ხელოვნური ინტელექტით აღჭურვილი რობოტი დაახვედრეს, რომელსაც მარცხი მოუვიდა. უყურეთ ქვემოთ მოცემულ ვიდეოში: