საქართველოს უსაფრთხოების სამსახურის ხელმძღვანელი, ვახტანგ გომელაური ამბობს, რომ ისნის სპეცოპერაციის დროს ლიკვიდირებული პირები, მათი ვერსიით, ე.წ. მწვანე საზღვრის გადმოკვეთით შემოვიდნენ საქართველოში. ამის შესახებ გომელაურმა სპეცოპერაციის საქმეზე შექმნილი ნდობის ჯგუფის შეხვედრის შემდეგ განაცხადა.

გომელაურის თქმით, უკვე დადგენილია როგორ შეიძინეს და მიიტანეს სპეცოპერაციის დროს ლიკვიდირებულმა პირებმა საბრძოლო იარაღი. მანვე აღნიშნა, რომ მტკიცებულებების მოძიება მიმდინარეობს იმის დასადგენად, თუ რომელი ქვეყნიდან და როგორ შემოვიდნენ საქართველოში.

სუს-ის ინფორმაციით, 21-22 ნოემბრის ანტიტერორისტული სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი. უწყებამ მოგვიანებით აღნიშნა, რომ ლიკვიდირებული პირებიდან ერთ-ერთი აჰმედ ჩატაევია. ჩატაევი ბოლო წლებში სირიაში იყო და ტერორისტული ორგანიზაცია ისლამური სახელმწიფოს მხარეს იბრძოდა.