შინაგან საქმეთა სამინისტროს განცხადებით, ხორავას ქუჩაზე მომხდარი განზრახ მკვლელობის ფაქტთან დაკავშირებით კიდევ სამი პირი დააკავეს.

უწყების თქმით, მშობლისთვის და მისი ორი შვილისთვის ცნობილი გახდა, რომ არასრულწლოვანმა განსაკუთრებით მძიმე დანაშაული ჩაიდინა, რაც სამართალდამცველებს არ შეატყობინა. შსს-ს განმარტებით, მშობელი დაკავებულია დანაშაულის დაფარვისთვის.

რაც შეეხება მოზარდებს, მათ მიმართ მიმდინარეობს საგამოძიებო მოქმედებები და შესაძლოა, გაიზარდოს დანაშაულის დაფარვისა და შეუტყობინებლობისთვის სისხლის სამართლის პასუხისგებაში მისაცემ პირთა წრე.

შსს-ს განცხადებით, გარდა ამისა, კიდევ ორმა მოქალაქებ ხელი შეუწყვეს არასრულწლოვნის მიმალვას, შესადამისად, ისინიც დაკავებული არიან დანაშაულის დაფარვისთვის.

მკვლელობა ხორავას ქუჩაზე

პირველ დეკემბერს, თბილისში, ხორავას ქუჩაზე არასრულწლოვნებს შორის ურთიერთშელაპარაკების შედეგად დაიღუპა ორი მოზარდი. ლევა დადუნაშვილი საავადმყოფოში მიყვანამდე გარდაიცვალა. დავით სარალძეს საავადამყოფოში სამი ოპერაცია გაუკეთდა, თუმცა ის მომხდარიდან მეორე დღეს გარდაიცვალა.

ამ დროისთვის მკვლელობის ბრალდებით დაკავებულია ერთი არასრულწლოვანი, ხოლო მეორე სავარაუდო დამნაშავე ამ დრომდე იძებნება. გუშინ, 3 დეკემბერს, მათ ორივეს ოფიციალურად წაუყენეს ბრალი. გამოძიება დამამძიმებელ გარემოებაში განზრახ მკვლელობის მუხლით მიმდინარეობს. ბრალის დამტკიცების შემთხვევაში არასრუწლოვნებს 13-დან 17 წლამდე პატიმრობა ელოდებათ.

პროკურატურა ორივე ბრალდებულის მიმართ აღკვეთის ღონისძიების სახით მოითხოვს პატიმრობის გამოყენებას.

პროკურატურის განცხადებით, 51-ე საჯარო სკოლის მეცხრე კლასის მოსწავლეებს შესვენებაზე საპირფარეშოში ერთ-ერთმა უფრსოკლასელმა მათ პნევმატური იარაღი მიუშვირა, რასაც უკმაყოფილება მოჰყვა და სიტყვიერ დაპირისპირებაში გადაიზარდა.

უწყების განმარტებით, ერთ-ერთმა უფროსკლასელმა მათ უთხრა, რომ გაკვეთილების შემდეგ ორივეს სკოლის გარეთ შეხვდებოდნენ. ერთ-ერთმა მეცხრეკლასელმა დახმარებისთვის არასრულწლოვან ნათესავს დაურეკა.

პროკურატურის თქმით, მეცხრეკლასელის ნათესავი მეგობრებთან ერთად სკოლასთან მივიდა, სადაც შეკრებილი იყვნენ დაპირისპირებული მეთერთმეტე კლასელები და მათი თხუთმეტამდე მხარდამჭერი. ვითარების გასარკვევად კი ხორავას ქუჩაზე გადაინაცვლეს. მოზარდებს შორის საუბარი სიტყვიერ შელაპარაკებაში გადაიზარდა, რასაც ფიზიკური დაპირისპირება მოჰყვა.

გაიგეთ მეტი: