51-ე სკოლის დირექტორმა, მანანა თურქაძემ რუსთავი 2-თან საუბრისას განაცხადა, რომ სკოლაში მოსწავლეებს სათამაშო პლასტმასის თოფი ჰქონდათ და არა პნევმატური იარაღი.

პროკურატურის განცხადებით, 51-ე საჯარო სკოლის მეცხრე კლასის მოსწავლეებს შესვენებაზე საპირფარეშოში ერთ-ერთმა უფრსოკლასელმა მათ პნევმატური იარაღი მიუშვირა, რასაც უკმაყოფილება მოჰყვა და სიტყვიერ დაპირისპირებაში გადაიზარდა.

"ხაზგასმით უნდა გითხრათ, რომ აქ საუბარია სათამაშო პალსტმასის თოფზე და არა პნევმატურ იარაღზე. მე მინდა, დავამშვიდო საზოგადოება და ყველა ჩვენი მშობელი, რომ სკოლაში არასდროს არ ყოფილა, რომ პნევმატური იარაღი შემოსულიყო და არც ეს არ იყო პნევმატური იარაღი", - ამბობს თურქაძე.

სკოლის დირექტორის თქმით, ის და სკოლის ადმინისტრაცია პასუხისმგებლობას თავს არ არიდებენ და პროკურატურასთან აქტიურად თანამშრომლობენ.

პირველ დეკემბერს, თბილისში, ხორავას ქუჩაზე არასრულწლოვნებს შორის დაპირისპირების შედეგად დაჭრილი სკოლის მოსწავლე საავადმყოფოში მისვლამდე დაიღუპა. ცივი იარაღით დაჭრილი მეორე არასრულწლოვანი, მომხდარიდან მეორე დღეს საავადმყოფოში გარდაიცვალა.

ამ დროისთვის მკვლელობის ბრალდებით დაკავებულია ერთი არასრულწლოვანი, ხოლო მეორე სავარაუდო დამნაშავე ამ დრომდე იძებნება. დღეს, 3 დეკემბერს, მათ ორივეს ოფიციალურად წაუყენეს ბრალი. გამოძიება დამამძიმებელ გარემოებაში განზრახ მკვლელობის მუხლით მიმდინარეობს.