თბილისის პროკურატურის ინფორმაციით, 51-ე სკოლასთან არასრულწლოვნის მიმართ განზრახ მკვლელობის შესაძლო ფაქტზე ორ მოზარდს ბრალი ოფიციალურად წაუყენეს. დაკავებულს ბრალდება საქართველოს სისხლის სამართლის კოდექსის 109-ე მუხლის მეორე ნაწილის "ბ" ქვეპუნქტით წარედგინა. მეორე მოზარდი იმავე მუხლით ბრალდებულად იქნა ცნობილი დაუსწრებლად, რადგან გამოძიებას ემალება.

პროკურატურა ორივე ბრალდებულის მიმართ აღკვეთის ღონისძიების სახით მოითხოვს პატიმრობის გამოყენებას.

პროკურატურის განცხადებით, 51-ე საჯარო სკოლის მეცხრე კლასის მოსწავლეებს შესვენებაზე საპირფარეშოში ექსვი უფროსკლასელი დახვდაღ, რომელთაგან ერთ-ერთმა მათ პნევმატური იარაღი მიუშვირა, რასაც უკმაყოფილება მოჰყვა და სიტყვიერ დაპირისპირებაში გადაიზარდა.

უწყების განმარტებით, ერთ-ერთმა უფროსკლასელმა მათ უთხრა, რომ გაკვეთილების შემდეგ ორივეს სკოლის გარეთ შეხვდებოდნენ. ერთ-ერთმა მეცხრეკლასელმა დახმარებისთვის არასრულწლოვან ნათესავს დაურეკა.

პროკურატურის თქმით, მეცხრეკლასელის ნათესავი მეგობრებთან ერთად სკოლასთან მივიდა, სადაც შეკრებილი იყვნენ დაპირისპირებული მეთერთმეტე კლასელები და მათი თხუთმეტამდე მხარდამჭერი. ვითარების გასარკვევად კი ხორავას ქუჩაზე გადაინაცვლეს. მოზარდებს შორის საუბარი სიტყვიერ შელაპარაკებაში გადაიზარდა, რასაც ფიზიკური დაპირისპირება მოჰყვა.

უწყების მიერ გავრცელებულ განცხადებაში ნათქვამია, რომ ჩხუბის დროს ერთ-ერთმა მონაწილემ, რომელსაც გაცნობიერებული ჰქონდა, რომ კონფლიქტის მონაწილეები არასრულწლოვნები იყვნენ, დანით განზრახ მოკვლის მიზნით, არასრულწლოვანს მრავალრიცხოვანი ჭრილობა მიაყენა. ასევე, კიდევ ერთმა მონაწილემ სხვა არასრუწლოვანს ორი ჭრილობა ფეხისა და გულმკერდის არეში მიაყენა, შემდეგ კი ორივე ბრალდებული შემთხვევის ადგილიდან მიიმალა.

მიყენებული ჭრილობების შედეგად ერთ-ერთი არასრულწლოვანი საავადმყოფოში მიყვანამდე გარდაიცვალა, ხოლო მეორე მოზარდი მეორე დღეს საავადმყოფოში.

პროკურატურის განცხადებით, ნივთმტკიცებად ამოღებულია ორი დანა, აქედან ერთ-ერთი გამოძიებას ინციდენტში მონაწილე მოწმემ გადასცა. დაკავებულმა მოწმეს იარაღი გადამალვისთვის მისცა. ბრალის დამტკიცების შემთხვევაში არასრუწლოვნებს 13-დან 17 წლამდე პატიმრობა ელოდებათ.

უწყების განმარტებით, არასრულწლოვანი ბრალდებულების არც ერთი ოჯახის წევრი ანდა ახლო ნათესავი პროკურატურის თანამშრომელი არ არის.

გაიგეთ მეტი: