შინაგან საქმეთა მინისტრის, გიორგი გახარიას განცხადებით, ბოლო ინფორმაციით გარდაცვლილია 11 ადამიანი და სხვადასხვა სამედიცინო დაწესებულებებში გადაყვანილია 19 პირი. გახარიას თქმით, პირველადი მოკვლევით, ხანძრის კერა მეოთხე სართულზე გაჩნდა:

"სამწუხაროდ, დაკვამლიანება მოხდა, ერთადერთი, დერეფნის, კიბის, კორიდორის და ხალხი იყო ბლოკირებული მეშვიდე სართულზე."

მინისტრის განცხადებით, ამ ეტაპზე სასტუმროში მეორადი კონტროლი მიმდინარეობს, მეხანძრე-მაშველები სართულებს ამოწმებენ, რაც დაახლოებით 2 საათი გაგრძელდება, რის შემდეგაც დაზარალებულების რაოდენობაზე საბოლოო ინფორმაცია გახდება ცნობილი.

ბათუმში, სასტუმრო ლეოგრანდში ხანძარი 24 ნოემბერს, საღამოს რვა საათისთვის გაჩნდა. მაშველებმა და პოლიციელებმა სასტუმროს შენობიდან ასზე მეტი ადამიანის ევაკუაცია მოახდინეს. მათ შორის არიან როგორც სტუმრები, ასევე სასტუმროს თანამშრომლები.

ხანძართან დაკავშირებით გამოძიება სსკ-ს 243-ე მუხლის მე-3 ნაწილით მიმდინარეობს, რაც სახანძრო უსაფრთხოების წესის დარღვევას გულისხმობს.