სახელმწიფო უსაფრთხოების სამსახურის ხელმძღვანელმა ვახტანგ გომელაურმა ჟურნალისტებს უთხრა, რომ ძალოვანმა სტრუქტურებმა მაქსიმალურად გააკეთეს ყველაფერი, რათა არ ყოფილიყო მხვერპლი და ზიანი.

"ალბათ ბევრს გაქვთ კითხვა, რატომ გაგრძელდა სპეცოპერაცია ამდენ ხანს. ეს სწორედ იმიტომ მოხდა, რომ არ დაშავებულიყვნენ მოქალაქეები, ძალოვანი სტრუქტურების თანამშრომლები, აქედან გამომდინარე იყო ეს ყველაფერი", – უთხრა მან ჟურნალისტებს სააავდმყოფოში დაჭრილი სამართალდამცავების მონახულების შემდეგ.

გომელაურის ინფორმაციით, სამართალდამცავები მსუბუქად არიან დაჭრილები. როგორც ის ამბობს, არსებობდა საფრთხე, მათ მძევლები აეყვანათ.

სუს-ის ხელმძღვანელმა თქვა, რომ გამოძიების ინტერესებიდან გამომდინარე, დამატებით დეტალებს სპეცოპერაციაზე ვერ იტყვის, თუნდაც მათ წარმომავლობასა და კავშირებზე რომელიმე ტერორისტულ ჯგუფთან.

"თუ შევუსადაგებთ რაც დღევანდელ დღეს მოხდა, თავისუფლად შეგვიძლია ვთქვათ, რომ მათ ტერორისტული აქტი ჩაიდინეს დღეს საქართველოში, ამხელა, თითქმის 18-საათიან ბრძოლას აწარმოებდნენ ძალოვან სტრუქტურებთან", – უთხრა გომელაურმა ჟურნალისტებს 22 ნოემბერს, საავადმყფოოდან გამოსვლის შემდეგ.

21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სუს-ის ცნობით, ლიკვიდირებულია დანაშაულებრივი ჯგუფის სამი წევრი. სპეცოპერაციის გამო მიმდებარე ტერიტორიიდან ევაკუირებული იყო მოსახლეობა, სკოლასა და სამ ბაღში კი სასწავლო პროცესი შეწყდა. სპეცოპერაციის შესახებ არაერთი მნიშვნელოვანი დეტალი და გარემოება ამ დრომდე უცნობია.