იუსტიციის მინისტრი, თეა წულუკიანი თავის თანაგუნდელზე, დეპუტატ შოთა შალელაშვილზე ამბობს, რომ ერთადერთი პარლამენტარია, რომელიც ხელფასს იღებს და სამსახურში არ დადის. წულუკიანმა ეს განცხადება მას შემდეგ გააკეთა, რაც შალელაშვილმა იგი ომბუდსმენის "უპასუხისმგებლო" შეფასების გამო გააკრიტიკა:

"კარგია, თუ ჩემმა განცხადებამ ის სამსახურში მიიყვანა და მუშაობა დააწყებინა. ყველა დეპუტატს, რომლებიც, მისგან განსხვავებით, დღე და ღამე შრომობენ, ვუსურვებ ნაყოფიერ სამუშაოს იმისთვის, რომ საქართველოს მომავალი ომბუდსმენი იყოს პასუხისმგებლიანი და მართლაც ამ პატივსაცემ საკონსტიტუციო ინსტიტუტს, ვეღარავინ აკადროს ზედაპირულობა, ტყუილი და მიკერძოება."

შოთა შალელაშვილი 2016 წელს პარლამენტში ქართული ოცნების პარტიული სიით მოხვდა. ის საგარეო ურთიერთობათა კომიტეტისა და დიასპორისა და კავკასიის საკითხთა კომიტეტის წევრია.

საქართველოს პარლამენტის მონაცემებით, 2016 წლის შემოდგომისა და 2017 წლის გაზაფხულის სესიების პლენარული სხდომები, არასაპატიო მიზეზით, შალელაშვილმა 10-ჯერ გააცდინა. რაც შეეხება კომიტეტებს, აქ დეპუტატს გაცდენები არ უფიქსირდება.

თეა წულუკიანმა უჩა ნანუაშვილის საქმიანობა ე.წ. ციანიდის საქმის ანგარიშის გამოქვეყნების შემდეგ შეაფასა. სახალხო დამცველის მონიტორინგის ანგარიშში ნათქვამია, რომ გამოძიების პროცესში დაშვებულმა დარღვევებმა სასამართლოს საბოლოო გადაწყვეტილებაზე გადამწყვეტი გავლენა იქონია. წულუკიანის აზრით, უჩა ნანუაშვილი პირველი უსამართლო ომბუდსმენია.