ჩრდილოეთ კორეის სახელმწიფო მედიამ დონალდ ტრამპი გააკრიტიკა, რადგან აშშ-ის პრეზიდენტმა კიმ ჩენ ინს შეურაცხყოფა მიაყენა, წერს The Guardian. მათ თქვეს, რომ ტრამპი ამისთვის სიკვდილს იმსახურებს.

მმართველი პარტიის გაზეთი როდუნ სინმუნი (Rodong Sinmun) ძირითად ყურადღებას სამხრეთ კორეაში აშშ-ის პრეზიდენტის ვიზიტზე ამახვილებს, რომელიც აზიის ტურის ფარგლებში მოეწყო. ვიზიტისას ტრამპმა გააკრიტიკა ჩრდილოეთ კორეის დიქტატურა.

"უარესი დანაშაული, რომლის გამოც მისი შეწყალება არ შეიძლება არის ის, რომ მან გაბედა და ჩვენი ლიდერის ღირსება შეურაცხყო", - ნათქვამია სტატიაში.

სტატიაში, ასევე ნათქვამია, რომ დონალდ ტრამპი ლაჩარია, რადგან დემილიტარიზებულ ზონაში ჩასვლაზე უარი თქვა.

აზიის ტურის დასრულებისას, 11 ნოემბერს დონალდ ტრამპმა დატვიტა:

"რატომ მეძახის კიმ ჩენ ინი "მოხუცს", თუ მე მას არასდროს დავუძახებდი "დაბალსა და მსუქანს". მე ძალიან ვცდილობ ერთ დღეს მისი მეგობარი გავხდე - იმედია, ოდესმე ეს შესაძლებელი იქნება".

ნოემბრის დასაწყისში, სამხრეთ კორეის პარლამენტში გამოსვლისას აშშ-ის პრეზიდენტმა კიმ ჩენ ინს მიმართა და თქვა, რომ თუ ის ბირთვულ იარაღზე უარს არ იტყვის, ჩრდილოეთ კორეას კატასტროფა ელოდება. ტრამპის თქმით, აუცილებლობის შემთხვევაში აშშ სამხედრო ძალას გამოიყენებს.

გამოსვლამდე ტრამპი იძულებული იყო, რომ სამხრეთ და ჩრდილოეთ კორეას დემილიტარიზებულ ზონაში ჩასვლა გადაედო. როგორც ცნობილია, ძლიერი ნისლის გამო პრეზიდენტის ვერტმფრენმა დაჯდომა ვერ მოახერხა. დემილიტარიზებული ზონის მონახულება აშშ-ის წინა პრეზიდენტების ტრადიციაა, რითაც ისინი თავიანთ მოკავშირეებს მხარდაჭერას უცხადებენ.

გაიგეთ მეტი: ჩრდილოეთ კორეის კრიზისი - დეტალები მოკლედ