საქართველოს სახალხო დამცველი მიიჩნევს, რომ მარნეულის სოფელ კაჩაგანის მოსახლეობასთან შეხვედრის დროს ქალაქის მერის, თემურ აბაზოვის განცხადება სექსისტური იყო. გავრცელებული ინფორმაციით, შეხვედრას მხოლოდ კაცები ესწრებოდნენ. რადიო მარნეულის თქმით, თემურ აბაზოვიც ადგილობრივებს დაეთანხმა და თქვა, რომ "ქალებს სადილი აქვთ გასაკეთებელი".

ახლადარჩეული მერმა, თემურ აბაზოვმა On.ge-ს უთხრა, რომ ღონისძიება მუნიციპალიტეტის მხრიდან არ იყო დაგეგმილი და სოფელში არსებული წყლის პრობლემის საკითხის გასარკვევად მივიდა.

"ვინც დაგვხვდა კაცები იყვნენ. იყვნენ იქ ქალებიც, ცოტა შორს იდგნენ, ალბათ, ერიდებოდათ ახლოს მოსვლა... ხუმრობით ვუთხარი, რომ ალბათ, სახლში საჭმელს აკეთებენო. მეტი არაფერი იყო ჩემი მხრიდან", - განაცხადა ახლადარჩეულმა მერმა.

სახალხო დამცველი მიიჩნევს, რომ ქვეყანაში ქალთა თანასწორობის მხრივ ბევრი გამოწვევა არსებობს, ერთ-ერთი მნიშვნელოვანი პრობლემა კი ქალთა სოციალურ და პოლიტიკურ ცხოვრებაში მონაწილეობის საკითხია.

მისი თქმით, თანამდებობის პირების მხრიდან მსგავსი დამოკიდებულება ამყარებს არსებული დისკრიმინაციის წამახალისებელ სტერეოტიპებს ქალისა და კაცის განსაზღვრული როლების შესახებ:

"აღნიშნული კი ქმნის საფრთხეს, რომ ქალები, მომავალში, სქესის გამო უფრო ხშირად დაექვემდებარებიან დისკრიმინაციას. ამასთან, განსაკუთრებით შემაშფოთებელია გენდერულად მჩაგვრელი პრაქტიკის მხარდაჭერა და წახალისება ქალაქის მერის მხრიდან, რომელსაც, თავის მხრივ, თანასწორი გარემოს შექმნის ვალდებულება აქვს".

სახალხო დამცველმა მოუწოდა მარნეულის მერს, თემურ აბაზოვს მომავალში თავი შეიკავოს სექსისტური გამონათქვამებისგან და თავისი საქმიანობის განხორციელების პროცესში ხელი შეუწყოს გენდერულ თანასწორობას რეგიონში.