საქართველოს ეროვნული უშიშროების საბჭოს მდივანი, დავით რაქვიაშვილი მიიჩნევს, რომ უსაფრთხოებისა და კრიზისების მართვის საბჭო საგანგებო სიტუაციების მართვის სამსახურთან გაერთიანებით ფოკუსირებული იქნება კრიზისების ოპერატიულ მართვაზე. მისი თქმით, უსაფრთხოების საბჭოს შექმნის დროს არსებობდა კითხვები შექმნის მოტივაციასა და მანდატზე.

"ჩვენ მიგვაჩნია, რომ იმისთვის, რომ საქართველომ ადეკვატურად უპასუხოს არსებულ გამოწვევებს, რუსულ ოკუპაციას, ჰიბრიდულ ომს,აუცილებელია ქვეყანაში არსებობდეს კოორდინაციის მექანიზმი უმაღლეს პოლიტიკურ დონეზე", - აღნიშნა რაქვიაშვილმა.

სამთავრობო ცვლილებების შესახებ პრემიერ-მინისტრმა, გიორგი კვირიკაშვილმა დღეს, 13 ნოემბერს ისაუბრა. მისი თქმით, უსაფრთხოებისა და კრიზისების მართვის საბჭოს საგანგებო სიტუაციების მართვის სამსახურთან გაერთიანებულ უწყებას შინაგან საქმეთა მოქმედი მინისტრი, გიორგი გომელაური უხელმძღვანელებს. შს მინისტრის თანამდებობას კი ეკონომიკის მინისტრი გიორგი გახარია დაიკავებს.