საქართველოს მთავრობაში დაგეგმილ სტრუქტურულ და საკადრო ცვლილებებთან დაკავშირებით ხვალ, 13 ნოემბერს, 11:00 საათზე, საქართველოს მთავრობის ადმინისტრაციაში პრემიერ-მინისტრის გიორგი კვირიკაშვილის საგანგებო ბრიფინგი გაიმართება.

გუშინ, 11 ნოემბერს, On.ge-ს ორმა დამოუკიდებელმა წყარომ ინფორმაცია მიაწოდა, რომ საქართველოში ოთხი სამინისტრო უქმდება. წყაროს ინფორმაციით, თანამდებობას ტოვებენ შს მინისტრი, გიორგი მღებრიშვილი და განათლების მინისტრი ალექსანდრე ჯეჯელავა. გაუქმებული სამინისტროების ჩამონათვალში მოხვდება:

  • ენერგეტიკის სამინისტრო;
  • გარემოსა და ბუნებრივი რესურსების დაცვის სამინისტრო;
  • სპორტისა და ახალგაზრდობის საქმეთა სამინისტრო;
  • სასჯელაღსრულების და პრობაციის სამინისტრო.

გაუქმებული სამინისტროების ფუნქციები, სავარაუდოდ, შემდეგნაირად გადანაწილდება:

  • ეკონომიკისა და მდგრადი განვითარების სამინისტრო ენერგეტიკის სამინისტროს ფუნქციებს სრულად, ხოლო გარემოს დაცვის სამინისტროს ფუნქციებს ნაწილობრივ შეითავსებს;
  • ნაწილობრივ შეითავსებს გარემოს დაცვის სამინისტროს ფუნქციებს სოფლის მეურნეობის სამინისტროც;
  • სპორტის სამინისტროს ფუნქციები განათლების სამინისტროსა და კულტურის სამინისტროზე გადანაწილდება;
  • სასჯელაღსრულების სამინისტრო კი იუსტიციის სამინისტროს შეუერთდება.