თბილისის 21-ე საჯარო სკოლაში სასწავლო პროცესის შეჩერების შესახებ განმარტება სკოლის დირექტორმა შორენა ბუნტურმა გააკეთა. მისი თქმით, გუშინ დღის მეორე ნახევარში გახდა სკოლისთვის ცნობილი, რომ შენობა ავარიულ მდგომარეობაშია და სწავლა უნდა შეჩერებულიყო. დირექტორის განმარტებით, სხვა გზა არ იყო, ამიტომაც იძულებული გახდნენ ეს გადაწყვეტილება მიეღოთ.

"გუშინ, დღის მეორე ნახევარში გახდა სკოლისთვის ცნობილი, რომ შენობა არის ავარიულ მდგომარეობაში და სწავლა უნდა შემეჩერებინა. ანუ, ექსპერტიზის დასკვნის საფუძველზე მაღალი ხარისხი მიენიჭა და ვერ გავაგრძელებდით სწავლას.

და დღეს შევხვდით განათლების სამინისტროს წარმომადგენელს მუნიციპალური განვითარების ფონდიდან და მათ ისაუბრეს, რომ ვინაიდან ასეთი ხარისხის დასკვნა წერია სამხარაულის დასკვნაში, სხვაანაირად ვერ ვიმოქმედებდით ბავშვების სიცოცხლის უსაფრთხოებიდან გამომდინარე. დრო იყო იმდენად ცოტა, რომ ვერ მოიძებნა ალტერნატიული გზა და გამოსავალი", - განაცხადა სკოლის დირექტორმა.

მისივე თქმით, რადგან სასკოლო საზოგადოებისთვის ონლაინსწავლა მიუღებელია, სკოლაში სასწავლო პროცესი 1 კვირით იქნება შეჩერებული, რა პერიოდშიც მოიძიებენ ალტერნატიულ ფართებს, ხოლო გაცდენილის აღდგენა შაბათის ან ორკვირიანი გახანგრძლივებული სწავლის ხარჯზე მოხდება.

"ამ ერთი კვირის განმავლობაში აუცილებლად მოიძებნება ისეთი გამოსავალი, რომ სასკოლო საზოგადოება კმაყოფილი იყო.... ისიც კი შემოგვთავაზეს, რომ თუ თქვენც მოიძიებთ ალტერნატიულ შენობას, გვითხარით, ვითანამშრომლებთ, გაგეხმარებით..." , — განაცხადა დირექტორმა.

21-ე საჯარო სკოლის დირექტორი შორენა ბუნტური ასევე განმარტავს, რომ სკოლამ ავტორიზაცია 2023 წელს გაიარა. "ავტორიზაციის ერთ-ერთი სტანდარტი არის ფიზიკური გარემო და იქ წერია ნამდვილად, რომ იყო პირველი ხარისხის, მაგრამ შეუსაბამო სეისმურ მოვლენებთან და საჭიროებდა გამაგრებას. ამ ხნის განმავლობაში, ამ სკოლაში ჩვენ მასპინძელი სკოლა ვიყავით ასევე 2 წელზე მეტი ვადით. ისიც მრავალრიცხოვანი სკოლაა, 1000 ბავშვზე მეტი... და ბუნებრივია, ბუნებრივი მოვლენების დროს დაემატა ხარისხი თუ ასეთი დატვირთვით, როცა სკოლა არ არის გათვლილი 2000-ზე მეტ ბავშვზე, გაიზარდა დაზიანება", — დასძინა მან.

ცნობისთვის, დღეს დილიდან, თბილისის 21-ე საჯარო სკოლასთან მშობლები, მოსწავლეები და მასწავლებლები საპროტესტო აქციას მართავენ. ისინი აცხადებენ, რომ სასწავლო პროცესის შეჩერების შესახებ ინფორმაცია გუშინ საღამოს მიიღეს.