საქართველოს პრეზიდენტმა გიორგი მარგველაშვილმა გერმანული ტელეარხ Deutsche Welle-ს ჟურნალისტთან, ჟანა ნემცოვასთან, საქართველო-რუსეთის ურთიერთობასა და ოკუპირებულ ტერიტორიებთან ურთიერთობის სტრატეგიაზე ისაუბრა.

როგორც მარგველაშვილმა თქვა, საქართველოს ოკუპაცია 1990-იან წლებში დაიწყო და დღემდე გრძელდება. მისივე განმარტებით, ოკუპაციისგან გასათავისუფლებლად, ქვეყანა უნდა დაელოდოს ისეთ ისტორიულ მომენტს, რომლის მსგავსიც იყო ბერლინის კედლის დანგრევა.

როგორც მარგველაშვილმა ინტერვიუში თქვა, მისთვის აღნიშნული ისტორიული მომენტი იქნება მაშინ, როცა რუსეთის პოლიტიკური ელიტა გვერდზე გადადებს აგრესიულ რიტორიკას და მზად იქნება ამ აგრესიული სლოგანების გარეშე საუბრისთვის. პრეზიდენტის აზრით საქართველო, თავისი განვითარებით, მზად უნდა დახვდეს ასეთ ისტორიულ მომენტს, რუსეთმა კი უნდა გააცნობიეროს რეალობა, რომლის მიხედვითაც საქართველო არის დამოუკიდებელი სახელმწიფო და საკუთარ მომავალ ის თავადვე შექმნის. გარდა ამისა, როგორც მარგველაშვილი ამბობს, საქართველო ფრთხილი უნდა იყოს რუსეთთან ურთიერთობისას, რადგან მას აქვს უზარმაზარი სამხედრო ძალა, მათ შორის, ატომური იარაღი.

დოიჩე ველეს ჟურნალისტმა პრეზიდენტს ჰკითხა, რა არის საქართველოს სტრატეგია: დაუახლოვდეს ევროკავშირსა და ნატოს, თუ გააუმჯობესოს ურთიერთობები რუსეთთან?

გიორგი მარგველაშვილმა გერმანული ტელეარხის კითხვას ასე უპასუხა:

"ჩვენ ველოდებით მომენტს, როდესაც ჩვენ გვექნება შესაძლებლობა, დავსხდეთ რუს პოლიტიკოსებთან და ვისაუბრებთ მომავალზე, თუ როგორ შეიძლება საქართველო-რუსეთის მოქალაქეებმა ისარგებლონ ორი ქვეყნის თანამშრომლობით. მაგრამ მე არ ვეთანხმები მოსაზრებას, რომ ევროკავშირთან და ნატოსთან თანამშრომლობა რუსეთის საგარეო პოლიტიკურ ინტერესებზე შეტევას ნიშნავს. ეს არის პარადიგმა, რომელიც ძალიან ეფექტიანად შექმნა რუსეთის პოლიტიკურმა ხელმძღვანელობამ.

7 წლის წინ რუსეთსა და ნატოს ძალიან ინტენსიური, რუსეთ-ნატოს ფორმატში ჰქონდათ ურთიერთობა. რუსეთს, როგორც სახელმწიფოს, აქვს უზარმაზარი ინვესტიცია და თანამშრომლობა ევროპასთან. რუსეთის ევროპის ენერგოპოლიტიკის უმნიშვნელოვანესი ფაქტორია. კონფორნტაცია ევროპასთან, რუსეთს არა მხოლოდ ეკონომიკურად, პოლიტიკურადაც აზარალებს".

მარგველაშვილის აზრით, საქართველო თავის გეოპოლიტიკური როლს ხედავს როგორც დასავლეთ-აღმოსავლეთთან, ისე რუსეთთან კავშირების დამყარებაში, რუსეთმა კი უნდა გააცნობიეროს მთავარი პრინციპი - საქართველო სუვერენული სახელმწიფოა და თავადვე განსაზღვრავს საკუთრ მომავალს.