იუსტიციის მინისტრი თეა წულუკიანი ვანო მერაბიშვილის საქმესთან დაკავშირებით აცხადებს, რომ როგორიც არ უნდა იყოს სტრასბურგის სასამართლოს გადაწყვეტილება, მის გათავისუფლებაზე ვერ იმოქმედებს.

წულუკიანი განმარტავს, რომ სტასბურგის სასამართლოს გადაწყვეტილება და თავად საქმე ეხება მის [მერაბიშვილის] წინასწარ პატიმრობას ერთ-ერთ სისხლის სამართლის საქმეზე. მისივე თქმით, ამჟამად, ვანო მერაბიშვილი არის მსჯავრდებული და აღარ იმყოფება წინასწარ პატიმრობაში.

ვანო მერაბიშვილის გათავისუფლების საფუძველი, შესაძლოა, გახდეს ვადაზე ადრე გათავისუფლების კომისიის გადაწყვეტილება, რაზეც იუსტიციის მინისტრმა თქვა, რომ აღნიშნული პროცედურები კანონითაა გაწერილი:

"აქ არ შეიძლება არსებობდეს რაიმე ტიპის სპეკულაციები".

შინაგან საქმეთა ყოფილი მინისტრისა და ყოფილი პრემიერის, ვანო მერაბიშვილის საქმეზე სტრასბურგის ადამიანის უფლებათა ევროპული სასამართლოს დიდი პალატა მიმდინარე წლის 28 ნოემბერს გამოაცხადებს გადაწყვეტილებას.

დიდმა პალატამ საქმის განხილვა საქართველოს საჩივრის საფუძველზე დაიწყო. იუსტიციის სამინისტრომ ვანო მერაბიშვილის საქმეზე ამავე სასამართლოს ერთ-ერთი პალატის მიერ 2016 წლის 14 ივნისს გამოტანილი გადაწყვეტილება გაასაჩივრა.

14 ივნისს, ევროპულმა სასამართლომ დაადგინა, რომ დაირღვა ადამიანის უფლებათა კონვენციის მე-18 მუხლი, მე-5 მუხლის პირველ ნაწილთან ერთად. მერაბიშვილის იმჟამიდელი ადვოკატი, ოთო კახიძე განმარტავდა, რომ კონვენციის მე-18 მუხლს მეხუთესთან ერთად ადგენენ მაშინ, როდესაც დისკრიმინაციული მოტივით ხდება პატიმრობის შეფარდება.

ვანო მერაბიშვილი 2013 წლის 20 მაისს დააკავეს. ყოფილი პრემიერი რამდენიმე საქმეზე იხდის სასჯელს, მათ შორის: აკურას ღვინის ქარხნის უკანონოდ ჩამორთმევის საქმე, სანდრო გირგვლიანის საქმე, 2011 წლის 26 მაისს აქციის დარბევა, მითვისება-გაფლანგვა და ამომრჩევლის მოსყიდვა, ვალერი გელაშვილზე ფიზიკური ანგარიშსწორების საქმე.