საქართველოს მთავარი პროკურატურა მეგის ქარდავას დაკავებას ადასტურებს. უწყებამ განცხადება დღეს, 2 ნოემბერს გაავრცელა.

როგორც საგამოძიებო უწყებაში ამბობენ, უკრაინის სამართალდამცავმა ორგანოებმა ქარდავა საქართველოს -პროკურატურის შუამდგომლობის საფუძველზე პირველ ნოემბერს დააკავეს.

"უკრაინის კომპეტენტური სასამართლოს გადაწყვეტილების საფუძველზე, მეგის ქარდავა მიმართ გამოყენებულია საექსტრადიციო პატიმრობა და მისი საქართველოში ექსტრადიციის საკითხი გადაწყდება უკრაინის კანონმდებლობის შესაბამისად", - აღნიშნავენ პროკურატურაში.

მეგის ქარდავას დაკავების შესახებ ინფორმაცია ტელეკომპანია რუსთავი 2-მა გუშინვე გაავრცელა. On.ge დაუკავშირდა შინაგან საქმეთა სამინისტროს, უწყების პრესსამსახურმა პირველ ნოემბერს განაცხადა, რომ მსგავსი ინფორმაცია მათთან ჯერჯერობით არ შესულა.

პროკურატურა ქარდავას მიმართ გამამტყუნებელი განაჩენით დასრულებული და სასამართლოში მიმდინარე საქმეების შესახებ ინფორმაციას ავრცელებს.

საქმეები, რომელზეც მეგის ქარდავა იძებნებოდა

  • ე.წ. ციხის ბუნტის საქმეზე მისჯილი აქვს სამი წლით და ცხრა თვით თავისუფლების აღკვეთა;
  • პატიმართა წამების საქმეზე (ე.წ. ნავთლუღის სპეცოპერაციის საქმე) მისჯილი აქვს შვიდი წლითა და ექვსი თვით თავისუფლების აღკვეთა;
  • ე.წ კასრების საქმეზე მისჯილი აქვს ცხრა წლით თავისუფლების აღკვეთა;
  • მსჯავრდებული ბ.რ.-ს წამების საქმეზე მისჯილი აქვს სამი წლითა და ცხრა თვით თავისუფლების აღკვეთა;
  • პოლკოვნიკ სერგო თეთრაძის წამების საქმეზე მისჯილი აქვს ცხრა წლით თავისუფლების აღკვეთა.

ამჟამად ბრალი წაყენებული აქვს

  • სახელმწიფო სახსრების გაფლანგვის საქმე;
  • ელდარ ქობალიას, კობა მატკავას და მერაბ ყოლბაიას წამების საქმე;
  • საქართველოს შს სამინისტროს სამეგრელო-ზემო სვანეთის სამხარეო მთავარი სამმართველოს უფროსის მოადგილეობის დროს ჩადენილი მალხაზ არქანიას წამების საქმე;
  • ელბერდ კობერიძის თავისუფლების აღკვეთისა და წამების საქმე.